BAKI. 4 aprel. TELEQRAF
2020 - 2024-cü il Avropa təsnifatları və 2021 - 2023-cü il UEFA Millətlər Liqasında Azərbaycanı 13 klubun futbolçuları təmsil edib.
Teleqraf UEFA-nın rəsmi saytına istinadən xəbər verir ki, onlara ümumilikdə 1 milyon 636 min avro ödənilib.
Eyni zamanda, Luka Quqeşaşvili AVRO-2024-də Gürcüstan millisinin heyətində yer aldığı üçün "Qarabağ" sabiq qapıçısına görə əlavə olaraq 81 min avro kompensasiya alıb.
Beləliklə, Azərbaycan klubları 2020 - 2024-cü illərdə 1 milyon 717 min avro qazanc əldə edib.
Halbuki 2018 - 2020-ci il təsnifatlarında bu rəqəm 1 milyon 140 min avro olub. AVRO-2020-nin təsnifat mərhələlərində Azərbaycanın 9 klubunun futbolçusu mübarizə aparıb.
Bura həmrəylik ödənişləri daxil deyil.
Ümumilikdə UEFA klubların güzəşt proqramına kişilərdən ibarət yığmalar arasındakı yarışların ümumi gəlirlərindən 240 milyon avro ayırıb. Bu, Avropa Klublar Assosiasiyası (ECA) ilə razılıq əsasında gerçəkləşib.
Ayrılan məbləğ AVRO-2020 ilə müqayisədə 40 milyon avro çoxdur. Vəsaitin hamısı 2024-cü il Avropa çempionatında iştirak üçün oyunçularını buraxan klublara sərf olunub.
Daha 92,3 milyon avro (AVRO-2020-də 70,4 milyon avro) öz milli komandalarının UEFA Millətlər Liqası 2020/2021, 2022/2023 mövsümlərində və 2020-2024-cü illərdə Avropa təsnifat matçlarında təmsil olunan klublara ödənilib. Bu zaman həmin oyunçuların yığma komandalarının AVRO-2024-ə keçib-keçməməsi nəzərə alınmayıb.
Əsasən Rusiyanın yarışlardan kənarlaşdırılması ilə əlaqədar bu tsikldan 7 milyon avro qalıb.
UEFA ümumilikdə 901 kluba pul ayırıb. Halbuki AVRO-2020-də bu say 699 olub.
UEFA Millətlər Liqası və Avropa təsnifat matçlarından hər oyunçu üçün kompensasiya 3 min 659 avro təşkil edib.
AVRO-2024-də bölgü oyunçunun bir günü üçün nəzərdə tutulub. AVRO-2024-də təmiz gəlir 1 milyard 267 milyon 600 min avro (AVRO-2016-da 847 milyon 300 min avro) təşkil edib.
Bu, AVRO-2020-nin ekvivalent rəqəmindən iki dəfə çoxdur. Lakin AVRO-2020-də COVİD-19 pandemiyası ilə əlaqədar gəlirlər xeyli aşağı düşüb. Çempionata ev sahibliyi etmiş 11 ölkə, o cümlədən, Azərbaycan təşkilati xərcləri əhəmiyyətli dərəcədə artırıblar.
