BAKI. 4 aprel. TELEQRAF
"Qəbələ" klubu növbəti mövsüm futbol üzrə Azərbaycan Premyer Liqasına vəsiqəni təmin edib.
Teleqraf xəbər verir ki, bölgə təmsilçisi buna I Liqanın XX tur oyununda "Baku Sporting" klubuna səfərdə 5:0 hesabı ilə qalib gələrək nail olub.
Baş hakim Əli Əliyevin idarə etdiyi qarşılaşmada qonaqların ilk və son qollarını 20-ci və 89-cu dəqiqələrdə Nicat Əliyev vurub. 43-cü dəqiqədə Domi Massumo fərqlənərək, aktivindəki qolların sayını 11-ə çatdırıb. “Qırmızı-qaralar”ın “97 nömrə”si Elşad Tağıyev isə 79-cu və 86-cı dəqiqələrdə dubl edib.
Kaxaber Tsxadadzenin rəhbərlik etdiyi kollektiv bu qələbə ilə xallarını 52-yə çatdırıb. 4-cü pillədəki "Baku Sporting"in aktivində 26 xal olduğundan və çempionatın bitməsinə 7 tur qaldığı üçün "Qəbələ" ən azı 3-cü pilləni təmin edib.
Qeyd edək ki, AFFA İcraiyyə Komitəsinin qərarına əsasən, növbəti mövsüm Premyer Liqada 12 komanda iştirak edəcək, I Liqadan isə 3 klub əsas liqaya yüksələcək. "Qəbələ" 2023/2024 mövsümündə sonuncu pilləni tutaraq aşağı diviziona düşmüşdü. 2006-cı ildən elitada yer alan "qırmızı-qaralar" 2 gümüş və 3 bürünc medal qazanıb.
