BAKI. 5 aprel. TELEQRAF
Rusiya Ukraynanın Krivoy Roq şəhərini ballistik raketlərlə vurub.
Teleqraf Ukrayna Fövqəladə Hallar üzrə Dövlət Xidmətinə istinadla məlumat verir ki, raket yaşayış massivinə düşüb, 14 mülki şəxs həlak olub, onlardan 6-sı uşaqdır. 50-dən çox insan isə xəsarət alıb. Ən kiçik yaralı 3 aylıq körpədir.
Hazırda yardım qərargahı yaradılıb. Güclü partlayış dalğası ən azı beş evə ziyan vurub, pəncərələrin sındığı, avtomobil və qarajların yandığı bildirilir.
Rusiya Müdafiə Nazirliyi bəyan edib ki, raket zərbəsi ukraynalı zabitlərin Qərb təlimatçıları ilə görüşdüyü restorana endirilib və nəticədə içərisində əcnəbi hərbçilər də olmaqla 85 nəfər ölüb.
Ukrayna Prezident Ofisinin rəhbəri Andrey Yermak Teleqram kanalında yazıb ki, baş verənlər dinc əhaliyə qarşı törədilmiş terrordur. "Krivoy Roqda insanların öldürülməsi Vladimir Putinin rejiminin nümayişkaranə terror hərəkətidir", - Ukrayna rəsmisi bildirib.
