BAKI, 4 aprel. TELEQRAF
"Fənərbağça"nın baş məşqçisi Joze Mourinyo qısa müddətdə Türkiyədə də qalmaqalları ilə məşhurlaşıb.
Portuqaliyalı mütəxəssis son olaraq, evdə "Qalatasaray"a 1:2 hesabı ilə uduzduqları Türkiyə Kubokunun 1/4 final oyunundan sonra rəqib komandanın baş məşqçisi Okan Burukun burnundan tutaraq yerə yıxılmasına səbəb olub.
Teleqraf indiyədək Mourinyonun iştirak etdiyi qalmaqallı hadisələri xronoloji ardıcılıqla təqdim edir:
1. "Old Trafford"daki sevinc ("Portu", 2004)
Joze Mourinyo "Portu"nun sükanı arxasında ikən UEFA Çempionlar Liqasının 1/8 finalında İngiltərə “Mançester Yunayted”i üzərində dramatik qələbə qazandı. Son dəqiqə qolundan sonra Mourinyo emosiyalarına hakim ola bilmədi və meydançaya qaçaraq sevincini qeyd etdi. Bu davranışı “Mançester Yunayted” azarkeşləri və mətbuat tərəfindən sərt tənqid olundu.
2. “Tottenhem”ə qarşı “avtobusu park etmək” ittihamı ("Çelsi", 2004)
“Çelsi”nin “Tottenhem”lə 0:0 hesablı heç-heçə etdiyi oyundan sonra Mourinyo rəqib komandanın müdafiə futbolunu tənqid edərək, onları qapının önündə avtobus park etdiyini demişdi. Bu termin sonradan müdafiə futboluna verilən məşhur adlardan birinə çevrildi. Hadisənin maraqlı tərəfi isə odur ki, bu termin daha çox elə Mourinyonun oyun üslubuna deyilir.
3. “Liverpul” azarkeşlərinə "sus" işarəsi ("Çelsi", 2005)
İngiltərə Liqa Kubokunun finalında "Xüsusi birisi" ləqəbli mütəxəssisin rəhbərlik etdiyi "Çelsi" “Liverpul”la qarşılaşırdı. Komandası bərabərlik qolunu vurduqdan sonra Mourinyo “Liverpul” azarkeşlərinə barmağını dodaqlarına qoyaraq “sus” işarəsini etdi. Bu hərəkət tribunalarda böyük qəzəbə səbəb oldu və Mourinyo matçdan sonra mətbuatda sərt tənqid edildi.
4. Hakimlərə qarşı ittihamlar ("Çelsi", 2005)
Mourinyo İspaniya “Barselona”sı ilə keçirilən oyundan sonra o zamankı rəqib baş məşqçi Frank Raykaardı baş hakim Anders Friskin otağına girməkdə ittiham etdi. Onun bu açıqlamasını UEFA ciddi araşdırdı və nəticədə Mourinyo iki oyunluq disklafikasiya olundu.
5. Eşli Koul ilə icazəsiz görüş ("Çelsi", 2005)
Mourinyo o zaman “Arsenal”ın əsas oyunçularından olan Eşli Koul ilə icazəsiz görüşdüyü üçün klubu "Çelsi" və özü 75 000 funt sterlinq cərimələndi. Bu hadisə İngiltərə futbolunda böyük səs-küyə səbəb oldu və Mourinyonun transfer bazarında qeyri-etik hərəkətlərə yol verdiyi iddiaları səsləndirildi. 2006-cı ildə isə Koul "zadəganlar"ın heyətinə qoşuldu.
6. “Mançester Yunayted” oyunçularını “fırıldaqçı” adlandırması ("Çelsi", 2005)
Mourinyo "Çelsi"də olarkən “Mançester Yunayted” oyunçularının simulyasiya etdiyini bildirərək onları “fırıldaqçı” adlandırdı. Bu açıqlamaya görə o, 5,000 funt sterlinq cərimələndi və İngiltərə Futbol Assosiasiyası tərəfindən xəbərdarlıq aldı.
7. Çirkli paltarlar üçün səbət ("Çelsi", 2005)
UEFA-nın texniki zona qadağası ilə üzləşdiyi zaman Mourinyonun Almaniya “Bavariya”sı ilə oyunda qeyri-adi üsula əl atdığı iddia edilir. Bildirilir ki, o, çirkli paltarlar üçün nəzərdə tutulan səbətdə gizlənərək komandasına təlimatlar verib. Bu hadisə futbol tarixinin ən maraqlı qalmaqallarından biri kimi yadda qalıb.
8. Hakimləri tənqid etməsi və cəza alması ("İnter", 2010)
“İnter”də çalışarkən hakimləri tənqid etdiyinə görə İtaliya Futbol Federasiyası Mourinyonu 35 000 avro cərimələdi. O, mətbuat konfransında İtaliya hakimlərinin “qərəzli” olduğunu iddia edərək futbol ictimaiyyətində yeni qalmaqala səbəb oldu.
9. Tito Vilanovaya qarşı hərəkət ("Real Madrid", 2011)
İspaniya Super Kubokunun finalında "Barselona"ilə oyunda Mourinyo barmaqları ilə rəqibin köməkçi-məşqçisi Tito Vilanovanın gözünə barmağını soxmağa çalışdı. Bu hərəkət futbol ictimaiyyətində böyük rezonans doğurdu və Mourinyo uzun müddət tənqid olundu.
10. Arsen Vengerlə münaqişə ("Çelsi", 2014)
“Çelsi” - “Arsenal” matçında Mourinyo və Arsen Venqer arasında texniki zonada mübahisə yaşandı. Məşhur görüntülərdə Vengerin Mourinyoya təzyiq etdiyi, portuqaliyalının isə onu itələdiyi göründü. İngiltərə Futbol Assosiasiyası hər iki məşqçiyə xəbərdarlıq etdi.
11. Yeva Karneyro qalmaqalı ("Çelsi", 2015)
“Çelsi”dəki ikinci dönəmində portuqaliyalı mütəxəssis klubun həkimi Yeva Karneyro ilə münaqişə yaşadı. Karneyro və fizioterapevt Con Fern “Suonsi” ilə oyunda Eden Azarı müalicə etmək üçün meydana daxil olduqdan sonra Mourinyo onları təhqir etdi. O, qadın həkimi fahişə adlandıraraq işinin öhdəsindən lazımi dərəcədə gəlmədiyini bildirdi. Bu hadisədən sonra Karneyro klubdan ayrıldı və Mourinyoya qarşı məhkəmə işi açıldı.
12. "Meymun kimi tullanırlar" ("Fənərbağça", 2025)
Fevralın 24-də Türkiyə Super Liqasında "Qalatasaray"la 0:0 hesablı heç-heçə etdikləri matçdan sonra keçirilən mətbuat konfransında Mourinyo rəqib komandanın oyunçularını meymun adlandırdı. O, "Cim-Bom"un ehtiyatda olan futbolçularının "meymun kimi tullandığını" deyib. Türkiyə Futbol Federasiyası baş məşqçini rasizmə görə və hakimləri təhqir etdiyi üçün 4 oyunluq disklafikasiya etdi və 42 500 avro cərimələdi.
Joze Mourinyo, həm uğurları, həm də qalmaqalları ilə dünya futbolunda ən çox müzakirə edilən şəxslərdən biridir. Onun meydandakı taktiki bacarıqları qədər, xarakteri və mübahisəli açıqlamaları da diqqət çəkir. O, futbola gətirdiyi rəng və qalmaqalları ilə hər zaman müzakirə olunmağa davam edəcək.
Bu qalmaqallar onun karyerasında bəzən böyük problemlərə səbəb olsa da, Mourinyo hər zaman futbolun ən maraqlı fiqurlarından biri olaraq qalacaq.
2024-cü ilin yayında "Fənərbağça"nın uğursuzluq zolağından çıxarılması üçün kluba dəvət olunan baş məşqçi hələlik azarkeşləri sevindirə bilmir. O, Türkiyədə "Qalatasaray mafiyası"nın olduğunu və hakimlərin "sarı-qırmızılar"a kömək etdiyini iddia edir. "Sarı-göylər" hazırda Türkiyə Super Liqasında 65 xalla 2-ci pillədə qərarlaşıb. "Qalatasaray" 71 xalla çempionatın bitməsinə 9 tur qalmış vahid liderdir.
"Fənərbağça" UEFA Avropa Liqasının liqa mərhələsində növbəti mərhələyə yüksəlməyə şans verən sonuncu - 24-cü pilləni tutub. İstanbul təmsilçisi pley-offda Belçika "Anderlext"ini (ilk oyun - 3:0, ikinci - 2:2) üstələsə də, 1/8 finalda Şotlandiyanın "Reyncers" klubundan (ilk oyun - 1:3, ikinci - 2:0, penaltilərlə - 2:3) zəif olub.
Qeyd edək ki, Joze Mourinyo karyerası ərzində vətənində "Benfika", "Unian Leyriya" və "Portu", İngiltərədə "Çelsi", "Mançester Yunayted" və "Tottenhem", İspaniyada "Real Madrid", İtaliyada isə "İnter" və "Roma" klublarının baş məşqçisi olub. O, karyerası ərzində iki dəfə UEFA Çempionlar Liqası, UEFA Avropa Liqası və UEFA Konfrans Liqası daxil olmaqla 26 titul qazanıb.
