BAKI, 4 mart. TELEQRAF
UEFA Azərbaycanın futbol infrastrukturuna sərmayə qoymaqdan ötrü AFFA-ya son 4 mövsüm ərzində 4 milyon 500 min avro həmrəylik ödənişi edib.
Teleqraf xəbər verir ki, bu barədə Avropa futbol qurumunun maliyyə hesabatında bildirilir.
Vəsait 2020/2021 mövsümündən 2023/2024 mövsümünədək dövrü əhatə edən sayca V HatTrick proqramı çərçivəsində ödənilib.
Proqramda iki əsas element üzrə ödəniş də nəzərdə tutulub: 800 min avro millli assosiasiyanın cari və yaxşı idarəçilik üzrə layihələrinə xərclərinin qarşılanmasına, maksimum 1 milyon 600 min avro isə illik həvəsləndirici ödənişlərə sərf olunur.
Həvəsləndirici ödənişlərin bölgüsü belə aparılıb:
250 min avro - UEFA-nın gənclər, qadın, futzal və həvəskar yarışlarına
250 min avro - UEFA-nın klubların lisenziyalaşdırılması sisteminin tətbiqinə
200 min avro - Yaxşı idarəçilik prinsiplərinin tətbiqinə və yaxşı idarəçilik üzrə layihələrin həyata keçirilməsinə
200 min avro - UEFA-nın Kütləvi futbol xartiyasının tətbiqinə
150 min avro - UEFA-nın Qadın futbolunun inkişafı proqramının tətbiqinə
100 min avro - UEFA-nın Məşqçilik konvensiyasının tətbiqinə
100 min avro - UEFA-nın Hakimlər konvensiyasının həyata keçirilməsinə
100 min avro - UEFA-nın Elit gənc oyunçuların inkişafı proqramının həyata keçirilməsinə
100 min avro - UEFA-nın Futbolda sosial məsuliyyət proqramının həyata keçirilməsinə
100 min avro - Milli yığmaların ezamiyyə xərclərinə
50 min avro - Danışılmış oyunlarla mübarizə və ədalətin təmin olunmasına
Mühasibat uçotu nöqteyi-nəzərindən hər bir milli assosiasiya kimi AFFA da milli yığma komandaların illik maliyyələşməsindən ildə 1,7 milyon avro əldə edir.
