BAKI, 4 aprel. TELEQRAF

“Komandamız Avropa üslubuna uyğun işləyir. İdman direktorumuz Səbuhi Səfiyatlı transfer işləri ilə məşğul olacaq. Müəyyən oyunçulara baxır, seçimlər etməyə çalışırıq. Bu il qurduğumuz komanda çox gözəl oyun nümayiş etdirdi, buna görə bu komanda gələn mövsümünkünün onurğa sütünu olacaq. Güclənmək isə “Qarabağ” kimi komandalara belə lazım olur”.

Bu sözləri Teleqraf-a açıqlamasında “Qəbələ”nin baş məşqçisi Kaxaber Sxadadze deyib.

Gürcüstanlı mütəxəssis I Liqanın XX turunda səfərdə “Bakı Sportinq”i 5:0 hesabla məğlub edərək elitaya vəsiqəni təmin etdikləri üçün özünü xoşbəxt saydığını bildirib.

Tsxadadze ötən mövsüm “qırmızı-qaralar”ın birinci liqaya düşdükdən sonra çətin dövrdən keçdiyini deyib: “Komandanın prezidenti Fariz Nəcəfov və idman direktoru Səbuhi Səfiyarlı ilə yaxşı münasibətimiz vardı. Onlarla danışdıqdan sonra qərar belə oldu ki, əlimizdən gələni edərək komandanı Premyer Liqaya qaytaraq. Məsləhətləşdik ki, şəxsi ambisiyamızdan uzaq duraraq, qarşımızda duran çətin işi fikirləşək. Bilirdik ki, I Liqada meydanların vəziyyəti yaxşı deyil, müəyyən çatışmazlıqlar olacaq, qalacağımız otellər səviyyəli olmayacaq və s. Üstəlik, ötən il komandamızdan xeyli futbolçu getdi. Çoxu düşünürdü ki, klub dağılacaq. Amma belə olmadı, yeni futbolçular gətirib güclü komanda qurduq. Əlbəttə, baş məşqçi nə qədər yüksək olsa da, futbolçularsız iş görə bilməz. Buna görə də futbolçularıma təşəkkür edirəm, bu yerə çatmaqda onların rolu böyükdür. Çox şadam ki, Premyer Liqaya qayıdışımızın təməlini qoyduq. Ən çox sevindiyim məqam odur ki, verdiyim sözə əməl etdim. Əməl edə bilirsənsə, o sözü ver”.

Baş məşqçi Premyer Liqaya I Liqanın çempionu kimi qayıtmağı hədəflədiklərini vurğulayıb:

“Bu günə qədər əsas məqsədimiz elitaya qayıtmaq idi. Bu artıq dəqiqləşdi. Ona görə biz başqa şeylər düşünmürdük. Çalışırdıq ki, məğlubiyyətsiz irəliləyək və buna nail olduq. Çempionat yenə davam edir. Məqsədimiz və bizə verilən tapşırıq mövsümü I Lliqanın çempionu kimi bitirməkdir. Çempionat hələ bitməyib. İstərdik ki, Liqanı məğlubiyyətsiz bitirək. Bu günə qədər belə gedir. Amma çempion olaraq və məğlub olmadan mübarizəni başa vurmağa çalışacağıq. Rəqiblərimizə böyük hörmətimiz var. Əlimizdən gələni edərək istəyimizə çatmağa səy göstərəcəyik”.