BAKI, 3 aprel. TELEQRAF

“Matias topuğumu əzdi. VAR-da da baxsaydılar, buna əmin olacaqdılar. Amma Əliyar Ağayev dedi ki, bu, penalti deyil”.

Bu sözləri “Sabah” komandasının futbolçusu Coy-Lens Mikels səfərdə "Neftçi"ni 2:1 hesabı ilə məğlub etdikləri Azərbaycan Kubokunun 1/2 final mərhələsinin ilk oyunundan sonra Teleqraf-a açıqlamasında deyib.

31 yaşlı hücumçu matçın 90+1-ci dəqiqəsində rəqib qapısı önündə Yuri Matiasla top uğunda mübarizə apararkən ayağından aldığı zədəyə görə penalti qərarı gözləsə də, baş hakimin fərqli qərar verdiyini bildirib: “Hakimliklə bağlı baş məşqçimiz Vasili Berezutski öz fikrini deyib. Mən bu barədə heç nə deyə bilmərəm. Amma penalti vardı, verilmədi”.

Mikels son vaxtlar daha çox zədələnsə də, bunun ciddi mənada onun üçün psixoloji problem yaratmayacağını qeyd edib: “Mənə heç bir problem olmayacaq. Çox ciddi zədə deyil. Həmişə zədədən sonra daha güclü qayıtmışam”.

Almaniyalı forvard cavab görüşünə də çox yaxşı hazırlasacaqlarını vurğulayıb: “İlk matç bizim üçün çox yaxşı oyun keçdi, vacib qələbə qazandıq. İkinci görüş daha marqlı keçəcək. Kuboku əldə etməyə iddialıyıq”.

Qeyd edək ki, “Sabah” və “Neftçi” arasında Azərbaycan Kubokunun 1/2 final mərhələsinin cavab oyunu aprelin 23-də “Bank Respublika Arena”da keçiriləcək.