BAKI, 5 iyun. TELEQRAF

"The Guardian" qəzetinin məlumatına görə, Britaniyanın ticarət naziri Piter Kile Brüsseldə Avropa Birliyinin ticarət komissarı Maroş Şefçoviç ilə rüsumsuz polad idxalını müzakirə etməyi planlaşdırır.

Teleqraf xəbər verir ki, Britaniya polad sənayesi əvvəllər yeni kvota sisteminin dağıdıcı nəticələrə səbəb ola biləcəyi barədə xəbərdarlıq edib. Aİ 1 iyuldan etibarən ittifaq xaricindəki ölkələrdən rüsumsuz polad idxalının ümumi həcmini 2024-cü il səviyyəsindən 47% azaltmaq niyyətindədir.

Paralel olaraq, Avropa istehsalçıları Breksitdən sonra öz tarif və kvota sistemini müstəqil şəkildə formalaşdıran Böyük Britaniyanın cavab tədbirlərindən narazılıqlarını bildiriblər.

Avropa polad istehsalçıları assosiasiyası olan "Eurofer" bəyan edib ki, London tərəfindən təklif edilən kvotalar Avropa poladının Britaniya bazarına çıxışını ciddi şəkildə məhdudlaşdırır.

Assosiasiyanın hesablamalarına görə, bir sıra məhsulların tədarükü on dəfə azala bilər.

"Eurofer"in baş direktoru Aksel Eqqert qeyd edib ki, Aİ və Böyük Britaniya tərəfindən tətbiq edilən oxşar məhdudiyyətlər daxili bazarları, əsasən Çindən gələn rəqabətdən qorumaq cəhdləri ilə izah olunur, lakin hər iki tərəf üçün qarşılıqlı itkilərə səbəb ola bilər.

Aİ mənbələri bildirib ki, Britaniya və Ukrayna da daxil olmaqla bir neçə ölkə yaranmış vəziyyətdən narazıdırlar. Bildirilir ki, kvotalar qaçılmaz olaraq hər iki tərəf üçün əlavə xərclərə səbəb olacaq və Britaniya daha çox zərbə alacaq.

Britaniya tərəfi bəyan edib ki, qarşılıqlı razılaşmalar əldə olunarsa, kvotaların azaldılmasına yenidən baxıla bilər.

Fikir ayrılıqları fonunda, Aİ ilə Böyük Britaniya arasında polad ticarətinin qarşılıqlı liberallaşdırılmasını və Çinə qarşı siyasətin koordinasiyasını nəzərdə tutan sözdə "polad klubu"nun yaradılması ehtimalı azalır.

Britaniya və Aİ rəsmiləri arasında danışıqlar cümə gününə planlaşdırılıb.