BAKI, 15 may. TELEQRAF

Livan və İsrail nümayəndə heyətləri Vaşinqtonda keçirilən sülh danışıqlarının üçüncü raundu zamanı uzunmüddətli təhlükəsizlik sazişini müzakirə etməyə başlayıblar.

Teleqraf xəbər verir ki, bu barədə ABŞ Dövlət Departamentindəki mənbə "Əl-Hadath" televiziyasına bildirib.

"Tərəflər mühüm irəliləyiş əldə ediblər və artıq atəşkəsin gücləndirilməsi ilə bağlı məsələlərlə məhdudlaşmırlar. Daha geniş razılaşmalar üçün əsas ola biləcək birgə iş mexanizmini müzakirə etməyə başlayıblar. İsrail qoşunlarının Livan ərazisindən çıxarılması məsələsinə gəldikdə isə, bu, şiə təşkilatı Hizbullahdan gələn təhlükənin aradan qaldırılmasından asılıdır", - deyə mənbə qeyd edib.

Tərəflər arasında görüşlər ABŞ Dövlət Departamentində Donald Tramp administrasiyasının fəal dəstəyi ilə keçirilir. Livan nümayəndə heyətinə ABŞ-dakı keçmiş səfir Simon Karam, İsrail nümayəndə heyətinə isə Milli Təhlükəsizlik Şurasının sədr müavini Yosef Draznin rəhbərlik edir.