BAKI, 10 yanvar. TELEQRAF

Qrenlandiyalılar ABŞ Prezidenti Donald Trampın "istəsələr də, istəməsələr də müəyyən addımlar atacağıq" xəbərdarlığına etiraz ediblər. Onlar "biz amerikalı olmaq istəmirik", "Arktika adasının gələcəyinə özümüz qərar verəcəyik", deyə bildiriblər.

Teleqraf "The Guardian"a istinadən xəbər verir ki, Qrenlandiya parlamentindəki beş siyasi partiyanın liderləri cümə axşamı ABŞ prezidentinin minerallarla zəngin adanı əldə etmək təhdidlərini təkrarlamasından qısa müddət sonra birgə bəyanat yayıblar.

Adanın Baş naziri Yens-Fridrix Nilsenin də daxil olduğu qrup bəyan edib: "Biz amerikalı olmaq istəmirik, danimarkalı olmaq istəmirik, qrenlandiyalı olmaq istəyirik. Qrenlandiyanın gələcəyini qrenlandiyalılar müəyyən etməlidir."

Keçmiş Danimarka müstəmləkəsi olan Qrenlandiyanın öz müqəddəratını təyin etmək istədiyini vurğulayan siyasi koalisiya heç bir başqa ölkənin onlara müdaxilə etmək hüququnun olmadığını bəyan edib: "Ölkəmizin gələcəyini tələsik qərarlar qəbul etmədən, gecikmələr olmadan və digər ölkələrin müdaxiləsi olmadan özümüz müəyyən etməliyik".