BAKI, 22 sentyabr. TELEQRAF

Ukrayna xarici işlər naziri Andrey Sibiqa Macarıstan Baş naziri Peter Madyarın Kiyevə ünvanlanan əsassız qarşıdurma xarakterli bəyanatlarından təəccübləndiyini bildirib.

Teleqraf xəbər verir ki, bu barədə o, X sosial şəbəkəsində yazıb.

Sibiqa qeyd edib ki, Karpat İnteqrasiya Təşəbbüsü bütün regionun inkişafına yönəlib və səkkiz Karpat ölkəsində rifahın, qarşılıqlı əlaqələrin və birgə layihələrin həyata keçirilməsinin təşviqinə xidmət edir.

“Macarıstanın belə qəti imtinasının səbəbləri naməlumdur”, - nazir bildirib.

Onun sözlərinə görə, bundan heç də az təəccüblü olmayan digər bir hadisə isə “Ukrayna və Macarıstanın enerji şirkətləri arasında ikitərəfli memorandumla razılaşdırılmış birbaşa, praqmatik və qarşılıqlı faydalı əməkdaşlığa” şübhə yaradan bəyanatların səsləndirilməsidir:

“Siyasət praqmatik ticarət əməkdaşlığına müdaxilə etdikdə bundan yaxşı heç nə çıxmır. Budapeştdən gələn son bəyanatlar bizi çaşqın vəziyyətdə qoyur. Belə təəssürat yaranır ki, Viktor Orban getsə də, onun bloklama və təcrid siyasəti çiçəklənməkdə davam edir”.

Sibiqa bu kontekstdə xatırladıb ki, orbanizm əvvəllər nə Macarıstana, nə də daha geniş regiona fayda gətirib və gələcəkdə də heç kimə fayda verməyəcək.

Macarıstan Baş naziri bundan əvvəl bəyan edib ki, onun ölkəsi Ukraynanın təşəbbüsü ilə yaradılan və Karpat regionu ölkələri arasında əməkdaşlığın gücləndirilməsini hədəfləyən “Karpat səkkizliyi” formatının üzvü deyil. Madyar vurğulayıb ki, onun hökuməti Ukraynanın ehtiyacları üçün Macarıstan ərazisində neft anbarlarının tikilməsinə imkan verməyəcək.