BAKI, 3 aprel. TELEQRAF
Rusiya ABŞ-nin təklif etdiyi atəşkəs razılaşmasını gecikdirir, üstəgəl, genişmiqyaslı hərbi çağırışa başlayır.
Teleqraf xəbər verir ki, bunu Böyük Britaniya ordusunun istefada olan zabiti, hərbi analitik Tim Kollinz deyib.
“Ukraynanın zərbələri Rusiya aerodromlarına çatıb, təyyarələr və hava hücumundan müdafiə vasitələri məhv edilib. Moskvanın özündə də müəmmalı partlayışlar baş verir, o cümlədən Prezidident Vladimir Putinin limuzininin partladılması. Bu, ya Ukraynanın effektiv təxribatından, ya da daxili narazılıqdan xəbər verir.
Putinin müttəfiqləri öz problemləri ilə məşğuldurlar. Çin bütün diqqətini Tayvana yönəldib, Lukaşenko Belarusda hakimiyyəti saxlamağa çalışır, Şimali Koreya ümidləri doğrultmur, İran isə ABŞ-nin hücumuna hazırlaşır”, - ekspert bildirib.
Kollinz ABŞ baxımından Ukrayna üçün durumun dəyişməyə başladığını söyləyib:
“Zelenski ilə Trampın Ağ Evdəki uğursuz görüşündən sonra Ukrayna üçün vəziyyət çətin görünürdü. Amma Putin Trampı məyus edərsə, bu, Ukraynaya silah təchizatının yenilənməsinə və Rusiyaya qarşı daha sərt sanksiyalara səbəb ola bilər. Konqresmen Lindsi Qrem mümkün tədbirləri “sümükqıran” adlandırıb. Sanksiyalar təkcə Rusiyaya deyil, onun ticarət tərəfdaşlarına da şamil oluna bilər.
Rusiyanın bahalı hava hücumundan müdafiə sistemlərini effektiv şəkildə məhv edən HIMARS və ATACMS-ların tədarükünü bərpa etmək mümkündür”.
Kollinzin fikrincə, S-300 və S-400-lərin sistematik şəkildə məhv edilməsi Rusiyanı ehtiyatlarının tükənməsi səbəbindən iyun ayına qədər sülh axtarmağa məcbur edə bilər:
“Sərt sanksiyalar onları əvəzləməyi qeyri-mümkün edəcək. Ağ Ev belə bir qərar verərsə, bu, müharibənin dinamikasını dəyişəcək. Tramp münaqişəni tez bir zamanda bitirməkdə qərarlıdır. Onun məyusluğu Putin üçün ciddi problemə çevrilə bilər, Rusiya lideri bunu nəzərə almalıdır”.
Keçmiş zabit ağır iqtisadi problemlər içində olan Rusiya üçün yeni ABŞ sanksiyalarının ölümcül olacağını proqnozlaşdırır.
