BAKI, 18 may. TELEQRAF

“Əlbəttə, biz suveren, müstəqil dövlətik. Bu tələblərə əməl etməməyi seçə bilərik, amma bu halda siz beynəlxalq şəbəkələrə - Qərbin sahib olduğu maliyyə resurslarına və texnologiyalarına inteqrasiya olunmayacaqsınız”.

Teleqraf xəbər verir ki, bunu Qırğızıstan baş nazirinin müavini Daniyar Amangəldiyev Avropa İttifaqının (Aİ) ölkəsinə qarşı sanksiyalarını yerli mediaya şərh edərkən deyib.

“Məhdudiyyətlər tətbiq etmək Qərbin hüququdur. Biz də bunun əsassız olduğuna inanırıq. Bu, şübhəsiz ki, qloballaşma proseslərinə - təkcə ticarətə deyil, həm də investisiyalara mane olur. Buna baxmayaraq, sərt reallıq var, ona görə də ölkəmizin maraqlarını və ya beynəlxalq müqavilələr çərçivəsində götürdüyümüz öhdəlikləri pozmayan birgə tədbirlər hazırlayırıq”, - o bildirib.

Daniyar Amangeldiyev qeyd edib ki, dialoq yolu ilə həmişə kompromis tapmaq mümkündür:

“2022-ci ildən başlayaraq bu məsələ daim gündəmimizdə olub. Bu, çox həssas məsələdir. Həm maliyyə sektorunu, həm də sahibkarlarımızın fəaliyyətini izləyirik. Xüsusilə, hər hansı bir şirkət tələblərə əməl etmədikdə və milli maraqlarımıza zidd olduqda Nazirlər Kabinetinə qəti tədbirlər görməyə imkan verəcək xüsusi tədbirlər paketi qəbul etmişik.

Tamamilə açığıq, heç bir statistikanı gizlətməmişik. Tamamilə şəffaf siyasət yürüdürük. Bütün məlumatları BMT-dəki “Comtrade”ə yükləyirik. Buna görə də tərəfdaşlarımız da heç nəyi gizlətmədiyimizi görürlər. Amma bəzən tənzimlənməli və təkmilləşdirilməli olan müəyyən aspektlər var. Biz də bunu edirik”.

Qırğızıstan rəsmisi əlavə edib ki, hazırda Qərb ölkələrindən Bişkekə heç bir təzyiq yoxdur:

“Bizi təəccübləndirən yeganə şey Avropa İttifaqının texnologiya və avadanlıq təchizatına çıxışı məhdudlaşdırmasıdır. Prinsip etibarilə, demək olar, bütün Aİ ölkələrinin dəstəyinə sahibik. Bu günə qədər heç bir Aİ üzv dövlətinin ölkəmizə qarşı sanksiyalardan yayındığımızı və ya başqa bir ölkəyə zərər verdiyimizi iddia edən birbaşa şikayəti olmayıb. Təhlil edilən və baxılması üçün Avropa Parlamentinə təqdim edilən müəyyən məsələlər var. Bunlar ayrı-ayrı departamentlərdir. Amma onlarla həm müsbət, həm də mənfi qarşılıqlı əlaqələrimiz var. Hər şey ola bilər”.