BAKI, 2 aprel. TELEQRAF
ABŞ administrasiyası Pekinin Tayvan ətrafındakı sularda və hava məkanında genişmiqyaslı hərbi təlimlər elan etməsindən sonra Çinə xəbərdarlıq edib.
Teleqraf xəbər verir ki, bu barədə Ağ Evin sözçüsü Karolin Levit bildirib.
Onun sözlərinə görə, Prezident Donald Tramp Tayvan boğazında sülhün qorunmasının vacibliyini dəfələrlə vurğulayıb, bu məsələnin dinc yolla həllini təşviq edir.
“Status-kvonu güc və ya zorla dəyişdirmək üçün hər hansı birtərəfli cəhdlərə qarşı olduğumuzu bir daha bəyan edirik”, - Levit vurğulayıb.
Çin Xalq Azadlıq Ordusu dünən Tayvan ətrafında irimiqyaslı hərbi təlimlərə başladığını açıqlayıb. Çin Silahlı Qüvvələrindən verilən açıqlamaya görə, əvvəlcədən elan edilmədən həyata keçirilən və ordu, donanma, hərbi hava və raket qüvvələrinin cəlb olunduğu təlimlər Tayvanın müstəqillik istəkləri ilə bağlı xəbərdarlıq və bunun qarşısının güc yolu ilə alınacağı məqsədi daşıyır.
