BAKI, 1 oktyabr. TELEQRAF

Orta Dəhlizdən danışarkən qeyd etmək lazımdır ki, son 5 ildə Mərkəzi Asiya regionu Azərbaycanın ən dinamik inkişaf edən ticarət tərəfdaşı olaraq qalır.

Teleqraf xəbər verir ki, bu barədə iqtisadiyyat naziri Mikayıl Cabbarov Bakıda keçirilən Mərkəzi Asiya, Monqolustan, Qafqaz və Əfqanıstan (CAMCA) Regional Forumunda çıxışında deyib.

O bildirib ki, Dünya Bankının 2023-cü ildə apardığı qiymətləndirməyə görə, əlaqələndirmə səylərinin davam etdirilməsi şərtilə, düzgün investisiya və səmərəlilik tədbirləri 2030-cu ilədək Orta Dəhliz boyunca ticarətin həcmini üç dəfə artıra və tranzit müddətlərini yarıya endirə bilər.

“2025-ci ilin avqustunda Vaşinqtonda əldə olunan razılaşmalar Cənubi Qafqaz üçün də yeni səhifə açır. Zəngəzur dəhlizi və ya TRİP marşrutu Azərbaycanın əsas hissəsini Naxçıvanla birləşdirəcək və Orta Dəhlizin daha bir halqasına çevriləcək.

Mərkəzi Asiya ölkələrinin bu əlavə imkanların və daşıma gücünün artırılmasında açıq şəkildə maraqlı olduğunu görürük. Sülhün əlaqələndirməni maliyyələşdirilə bilən real layihəyə necə çevirdiyini də müşahidə edirik.

Müasir dəhlizlər sadəcə yük daşımalarından daha böyük məna daşıyır.

Enerji sahəsində Cənub Qaz Dəhlizi artıq fəaliyyət göstərir. Növbəti mərhələ elektrik enerjisidir. Avropa İttifaqı tərəfindən ümumi maraq kəsb edən layihə kimi tanınan Qara Dəniz sualtı elektrik kabeli, eləcə də Azərbaycan, Qazaxıstan, Özbəkistan və Gürcüstanla birlikdə həyata keçirilən Xəzər Yaşıl Enerji Dəhlizi bu istiqamətdə mühüm layihələrdir. Bu dəhlizin yaradılması ilə bağlı müvafiq saziş Azərbaycan, Qazaxıstan və Özbəkistan prezidentləri arasında COP29 çərçivəsində imzalanıb”, - deyə M.Cabbarov əlavə edib.