BAKI, 11 may. TELEQRAF

"Bütün şəhidlərimizi öz balam bilirəm".

Bu sözləri Teleqraf-a açıqlamasında dünən Prezident İlham Əliyevlə Zəngilanda görüşən Vətən Müharibəsi şəhidi Samir Sarıyevin atası Əli Sarıyev deyib.

"Prezidentimizlə görüşdə demək istəyirdim ki, Allah torpaqlarımız uğrunda canını fəda edən bütün şəhidlərimizə rəhmət eləsin! O igidlərin heç birini Samirdən ayırmıram", - deyə şəhid atası bildirib.

Ə.Sarıyev qeyd edib ki, övladı Zəngilanı görməyi çox arzulayırdı: "Samir işğalda olan torpaqlarımız, Qarabağımız uğrunda canından keçdi, təəssüf ki, çox sevdiyi Zəngilanı görə bilmədi. Buna görə Prezidentimizlə görüşdə çox həyəcanlandım, kövrəldim".

Şəhidin qardaşı Elvin Sarıyevin sözlərinə görə, Samir İkinci Qarabağ müharibəsi başlayanda heç kimin xəbəri olmadan könüllü cəbhəyə yazılıb.

"2020-ci ilin oktyabrın 10-da işə gedərkən mənə zəng gəldi və qardaşımın müharibəyə gedəcəyi bildirildi. Qardaşım müharibədə ilk könüllülərdən oldu. Samirin İkinci Qarabağ müharibəsinə könüllü yollanması general Polad Həşimovun şəhid olmasından qaynaqlanırdı. Samirin 1 il 6 aylıq hərbi xidmət dövründə Polad Həşimov onun manqa komandiri olmuşdu. O, əsgərlikdən gəldikdən sonra Polad Həşimov ona öz adından təşəkkürnamə göndərmişdi. Polad Həşimov şəhid olanda Samir çox pis olmuşdu, özünə yer tapa bilmirdi. Samir onun dəfninə də getmişdi. Deyirdi ki, şəhid qardaşlarımızın qisasını alacağıq", - o vurğulayıb.

E.Sarıyev qeyd edib ki, qardaşının əvvəldən hərbi sahəyə marağı olub:

"Bir daxili həvəsi var idi. Söhbət əsnasında deyirdi ki, hərbi forma geyinmək istəyirəm. Samirin arzusu Zəngilana, öz yurduna getmək, torpaqlarımızda yaşamaq idi.

Oktyabrın 10-dan 26-a qədər mənimlə telefonla danışırdı, mənə şəkillər göndərirdi. Deyirdi ki, şəkillərimi çıxartdırıb evə qoy. "Atamdan muğayat, onun yanında ol" deyirdi. Amma həmin vaxtdan sonra əlaqə saxlamadı. Bir neçə gün keçdi, artıq mən çox narahat olmağa başladım. Yanında olan şəxslərlə əlaqə saxlayırdım. Deyirdilər ki, Samir yuxarıdadır, biz aşağıdayıq. Samir oktyabrın 27-i şəhid olub, amma biz çox gec bildik. Əlində pələng döyməsi vardı, əmim o döymədən tanımışdı".

Şəhid qardaşının sözlərinə görə, indi Samir olmadan Zəngilana getmək onun üçün çətindir:

"Biz iki qardaş idik. Anamızı itirmişdik, atamız bizə həm ata, həm ana olub. Mən Zəngilandan çıxanda uşaq idim. İndi isə oraya tək gedirəm, bu, mənim üçün ağırdır. Dünən atam ölkə başçısı ilə görüşdə də çox şey demək istəyirdi, amma kövrəldi, həyəcanlandı deyə, danışa bilmədi".