BAKI, 5 mart. TELEQRAF
Türkiyə Futbol Federasiyasının İntizam Komitəsi “Fənərbağça”nın baş məşqçsi Joze Mourinyonu 3 oyunluq cəzalandırıb.
Teleqraf xəbər verir ki, portuqaliyalı mütəxəssis Türkiyə Kubokunun 1/4 finalında “Qalatasaray”la oyundan sonra rəqib həmkarı Okan Burukun burnundan yapışdığına görə diskvalifikasiya olunub.
Məlumata görə, İntizam Komitəsi Burukun “Fənər”in baş məşqçisini təxribata çəkdiyini əldə əsas tutaraq, Mourinyoya ağır cəza verməyib.
Mourinyonun köməkçiləri Salvatore Foti və Sandro Zufiçə 4 oyunluq, qırmızı vərəqə alan futbolçulardan Mert Hakan Yandaş və Frede 3 oyunluq cəza verilib.
Joze Mourinyo, Mert Hakan Yandaş və Fred dörd oyundan az cəza aldıqlarından, cəzaları yalnız Türkiyə Kuboku oyunlarına aid ediləcək. 4 oyunluq cəza alan Salvatore Foti və Sandro Zufiç isə “sarı-göylər"in qarşıdakı həftələrdə oynayacağı 4 Super Liqa matçında ehtiyat oyunçular skamyasında olmayacaq.
Yada salaq ki, qalmaqalla başa çatan oyunda “Qalatasaray” 2:1 hesabı ilə qalib gələrək, yarımfinala yüksəlib.
