BAKI, 2 aprel. TELEQRAF

Futbol üzrə Türkiyə Kubokunda növbəti yarımfinalçı müəyyənləşib.

Teleqraf xəbər verir ki, 1/4 final mərhələsinin üçüncü oyununda “Fənərbağça” əzəli rəqibi “Qalatasaray”ı qəbul edib.

“Şükrü Saracoğlu” stadionunda keçirilən qarşılaşmanı “sarı-qırmızılar” qazanıb - 2:1.

Joze Mourinyonun rəhbərlik etdiyi kollektivdən Sebastyan Şimanski (45+2-ci dəqiqə), Okan Burukun komandasından isə Viktor Osimhen (10; 27 - penalti ilə) fərqlənib.

90+3-cü dəqiqədə tərəflər arasında yaşanan çaxnaşmaya görə baş hakim Cihan Aydın ehtiyat oyunçular skamyasında olan 3 nəfərə qırmızı vərəqə göstərib. “Fənərbağça”dan Mert Hakan Yandaş, “Qalatasaray”dan isə Barış Alper Yılmazla Kerem Demirbay cəzalanıb.

Referi oyunun əsas vaxtına 11 dəqiqə əlavə etsə də, o, tərəfləri 16 dəqiqə meydanda saxlayıb.

“Qalatasaray” yarımfinal mərhələsində “Konyaspor”la qarşılaşacaq.

Qeyd edək ki, Türkiyə Kubokunda 1/4 final mərhələsinə aprelin 3-də “Beşiktaş” - “Göztepe” matçı ilə yekun vurulacaq. Qalib komanda “Trabzonspor”la üz-üzə gələcək.