BAKI, 8 oktyabr. TELEQRAF
Böyük Britaniyada yaşayan iki Latviya vətəndaşı Kembricşirdə Kral Hərbi Hava Qüvvələrinin Molsvort hərbi bazasına soxulduqlarına görə həbs edilib.
Teleqraf xəbər verir ki, saxlanılanlar 8 oktyabr gecəsi hasarı aşaraq hərbi obyektə daxil olublar. Kişilər hərbi polisin diqqətini bazanın yaxınlığında park edilmiş bir nəqliyyat vasitəsinə görə cəlb ediblər.
Saxlanılanlardan birinin 36, digərinin isə 32 yaşı var. Onlar əvvəlcə məhdud ərazilərə qanunsuz daxil olmaq və əmlaka ziyan vurmaq şübhəsi ilə saxlanılıblar. Lakin hazırda onlar Milli Təhlükəsizlik Qanununu pozmaqda da şübhəli bilinirlər. Hər ikisi hələ də Kembricşir polis bölməsində saxlanılır.
Polis ilkin məlumata görə, bu hadisənin sentyabrın sonlarında Qlosterşirdəki RAF Fairford yaxınlığında baş verən hadisələrlə əlaqəsi olmadığını vurğulayıb. Terrorizm və partlayıcı maddələr qanunlarını pozmaqda şübhəli bilinən beş nəfər həbs edilib. Daha sonra onlar girov müqabilində sərbəst buraxılıblar və onların mikroavtobuslarında partlayıcı maddə tapılmayıb.
