BAKI, 17 dekabr. TELEQRAF

"Avropa ölkələri Belarus ərazisindən gələ biləcək təhlükəni qiymətləndirməlidirlər".

Teleqraf xəbər verir ki, bunu Bundestaqın deputatı Roderik Kizevetter “Ukrinform”a açıqlamasında deyib.

“Belarusdan gələn təhlükəni çox ciddi qəbul etməliyik. Belarus hazırda Rusiya üçün, xüsusən də koqnitiv və hibrid müharibələrdə rol oynayır, bunu “Oreshnik” raketlərinin planlaşdırılan yerləşdirilməsi ilə bağlı təhdidlər və Belarusun miqrasiya yolu ilə qeyri-sabitlikdəki rolu sübut edir. Digər tərəfdən, Rusiya həmçinin qoşunların bu cür yerləşdirilməsi ilə Belarusu suveren bir qurum deyil, öz ərazisinin ayrılmaz hissəsi hesab etdiyini göstərmək istəyir”, - deputat bildirib.

O xatırladıb ki, Belarus coğrafi mövqeyinə görə həssas zonadır və bunu 2022-ci ilin fevralında Ukraynaya tammiqyaslı hücum nümayiş etdirib.

Kizevetter qeyd edib ki, Rusiya Kalininqraddan Avropanı da təhdid etdiyi üçün siyasi şantaj və təhdid atmosferinin yaradılması artıq Rusiyanın nəzarəti altında baş verir.

"Bu, ilk növbədə idrak müharibəsidir. Əsas məqsədi NATO və Aİ-ni parçalamaqdır", - alman siyasətçi bildirib.

O, Ukraynadakı vəziyyəti həlledici adlandırıb. Onun sözlərinə görə, əgər Ukrayna öz mövqeyini qoruyub saxlaya və Rusiyanı dəf edə bilsə, hücum ssenarisi daha az real olacaq. Kisevetter vurğulayıb ki, buna görə də tərəfdaşlar öz təhlükəsizlik maraqları naminə Ukraynaya Rusiyanı çəkindirmək üçün daha əhatəli və güclü dəstək verməlidirlər.

O hesab edir ki, NATO qətiyyətli, ağıllı addım atsa, hücumu dəf edə bilər.

“Əgər biz hibrid hücumlara cavab verməsək, Rusiya özünü cəsarətli hiss edəcək. Növbəti iki il təhlükəsizlik üçün çox vacibdir. Çünki Rusiya Avropanın hərbi xərclərini əhəmiyyətli dərəcədə artırmasını gözləməyəcək. Hazırda yalnız Ukrayna Rusiyanı çəkindirir”, - Kizevetter bildirib.

O qeyd edib ki, Rusiya özünü bütün Qərblə müharibə vəziyyətində görür və həm personal, həm də avadanlıq baxımından strateji və hədəflənmiş şəkildə yenidən silahlanma yolu ilə qarşıdurmaya hazırlaşır. Rusiyanın işə qəbul və səfərbərlik rəqəmləri də onun imperiya ambisiyalarının Ukraynadan kənara çıxdığını göstərir.

Alman parlamentari yekun olaraq bildirib ki, Rusiya uzunmüddətli münaqişəyə yönəlmiş müharibə iqtisadiyyatı yaradıb.