BAKI, 3 aprel. TELEQRAF

Türkiyənin Cümhuriyyət Xalq Partiyasının (CHP) sabiq sədri Kamal Kılıçdaroğlu 6 apreldə keçiriləcək növbədənkənar qurultayda namizəd olmayacağını bəyan edib.

Teleqraf xəbər verir ki, bu barədə Kılıçdaroğlu özü danışıb.

Sabiq CHP sədri namizəd olub-olmaması ilə bağlı suala "Xeyr, mən namizəd deyiləm" deyə cavab verib.

Kemal Kılıçdaroğlu, həmçinin qurultayda iştirakına dair suala da aydınlıq gətirib:

"Bayram münasibətilə bir müddətdir istirahətdəyəm. Əgər dəvətnamə gəlibsə, iştirak edərəm. Amma hazırda ofisdə olmadığımdan bununla bağlı məlumatım yoxdur. Bir-iki günə qayıdacağam, əgər dəvətnamə gəlibsə, gedərəm".

Qeyd edək ki, CHP-nin qurultay nümayəndələri Kamal Kılıçdaroğlunun namizədliyinin irəli sürülməsi ilə bağlı imza toplamışdı.