BAKI, 3 noyabr. TELEQRAF

“Ermənistan müxalifəti layihəni görmədən və məzmunu ilə tanış olmadan “yox” kampaniyasına başlayıb”.

Teleqraf xəbər verir ki, bunu Ermənistanın ədliyyə naziri Srbuhi Qalyan yeni konstitusiya layihəsinin mətni ilə bağlı deyib.

“İllərdir bu işlə məşğuluq, istəyirik ki, qərarı xalq versin. Kimin nə deməsi məni qətiyyən maraqlandırmır. Mən öz işimə cavabdehəm. Ədliyyə Nazirliyinin bütün komandası ilə, əlbəttə, Konstitusiya Şurasının iştirakı ilə müvafiq layihə hazırlamışıq və onu xalqın mühakiməsinə təqdim etmək istəyirik”, - nazir bildirib.

O əlavə edib ki, insanlar layihəni oxuyacaq, bəzi müddəalarla razılaşacaq, bəziləri ilə isə razılaşmayacaq və nəticədə öz qərarlarını verəcəklər.

Srbuhi Qalyanın sözlərinə görə, müxalifət layihəni görmədən və məzmunu ilə tanış olmadan “yox” kampaniyasına başlayıb və “bu, filankəsin konstitusiyasıdır” kimi fikirlər səsləndirir.

“Bu, bizim Konstitusiyamızdır”, - ədliyyə naziri vurğulayıb.

Baş nazir Nikol Paşinyanın konstitusiyanın qəbul edilməsi üçün müxalifəti küçə mübarizəsi ilə hədələməsi barədə fikri soruşulanda Qalyan belə cavab verib:

“Qanuni olan demokratik prinsiplərə uyğundur. Birincisi, xalqın səsinə qarşı mitinq keçirməkdən söhbət getmir. Parlamentdə səslər elə bölünüb ki, konstitusiyanın referenduma çıxarılması, yəni xalqın qərar verməsi üçün müəyyən həddi keçmək lazımdır.

İndi müxalifət demokratiyanın işləyib-işləməməsinə qərar verə bilər. Əgər müxalifət səsverməyə qarşıdırsa, deməli, səsvermənin demokratiyasına qarşıdır. Əgər müxalifət xalqın yeni konstitusiyaya qarşı səs verəcəyini düşünürsə, niyə qorxur? Bəlkə də müxalifət seçiciləri referendumun tərəfdarıdırlar, gəlin irəli getməyək və görək.

Əslində, heç bir ölkədə üçdə iki tələbi yoxdur, yəni demokratiyanın birbaşa tətbiqi formal tələblərlə məhdudlaşdırıla bilməz”.