BAKI, 6 fevral. TELEQRAF

Azərbaycan və Ermənistan hökumətləri arasında qarşılıqlı ticarət əlaqələrinin qurulması məqsədilə potensial məhsul qruplarının siyahısı mübadilə edilib.

Teleqraf xəbər verir ki, bu barədə Ermənistanın iqtisadiyyat naziri Gevorq Papoyan bildirib.

"Tərəflər hansı malların alınıb-satıla biləcəyini müəyyənləşdirmək üçün ilkin siyahıları bir-birinə təqdim ediblər. Hazırda həmin sənədlər biznes nümayəndələri tərəfindən nəzərdən keçirilir",- o qeyd edib.

Nazir xatırladıb ki, Azərbaycan istehsalı olan benzin və dizel yanacağı artıq Ermənistan bazarında mövcuddur, lakin Azərbaycan bazarında Ermənistan malları yoxdur.

"Tərəflər qarşılıqlı tədarük üçün mal siyahılarını mübadilə və müzakirə ediblər. Biz başa düşürük ki, bazarlar hər iki tərəf üçün açıq olmalıdır: həm onlar üçün bizim bazarımız, həm də bizim üçün onların bazarı. Fikrimcə, bunun üçün vaxt lazımdır. Bu, tədricən baş verən prosesdir", - o bildirib.

Nazir vurğulayıb ki, qarşılıqlı tədarüklər üçün lazımi şəraitin böyük hissəsi artıq yaradılıb, lakin tam logistik əlaqələndirmənin olmaması və digər məsələlər hələ də açıq qalır.

Onun sözlərinə görə, bu istiqamətdə iş davam edir və lazım gələrsə, malların Ermənistan ərazisindən keçə bilməsi üçün artıq nəqliyyat marşrutları və əlaqə kanalları açılıb.