BAKI, 12 mart. TELEQRAF

Türkmənistanın 2026-cı ildə MDB-yə sədrlik konsepsiyası və onun həyata keçirilməsi üzrə fəaliyyət planı MDB İcraiyyə Komitəsinin rəsmi saytında dərc edilib.

Teleqraf xəbər verir ki, sənəddə beş prioritet sahə müəyyən edilib: sülh və təhlükəsizliyin qorunması, iqtisadiyyat və nəqliyyat əlaqələrinin inkişafı, rəqəmsal transformasiya, ətraf mühit gündəliyi və humanitar əməkdaşlıq.

Siyasi sahədə regional sabitliyin gücləndirilməsi və MDB ölkələri arasında diplomatik dialoqun intensivləşdirilməsi planlaşdırılır.

İqtisadi istiqamətə Şimal-Cənub və Şərq-Qərb nəqliyyat dəhlizlərinin inkişafı, enerji əməkdaşlığının genişləndirilməsi, ticarət və investisiyaların stimullaşdırılması daxildir.

Ətraf mühitin qorunması gündəliyinə bərpaolunan enerji və iqlim dəyişikliyinə uyğunlaşma sahəsində birgə layihələrin həyata keçirilməsi daxildir.

2026-cı il üçün tədbirlər planına 25 əsas tədbir daxildir.