BAKI, 13 iyun. TELEQRAF
İsrailin Rusiyadakı səfirliyi son hadisələrlə əlaqədar ölkənin dünya üzrə bütün diplomatik nümayəndəliklərinin fəaliyyətini dayandırdığını bəyan edib.
Teleqraf xəbər verir ki, bu barədə "RİA Novosti" məlumat yayıb.
Məlumatda vurğulanır ki, bu qərar bölgədə baş verən son hadisələr fonunda qəbul olunub.
İsrailin rəsmi qurumları vəziyyəti qiymətləndirərək diplomatik nümayəndəliklərin müvəqqəti bağlanmasını təhlükəsizlik baxımından zəruri hesab edib.
Xatırladaq ki, İsrail Hərbi Hava Qüvvələri iyunun 13-də səhər saatlarında İrana zərbələr endirib. Hücum zamanı ölkənin Fordo və Natantz nüvə obyektləri, eləcə də hərbi bazaları hədəfə alınıb. İranın Atom Enerjisi Təşkilatı Natanz nüvə obyektinin məhv edildiyini təsdiqləyib.
Hava əməliyyatları nəticəsində İran İslam İnqilabı Keşikçiləri Korpusunun baş komandanı general-mayor Hüseyn Salami, Silahlı Qüvvələrin Baş Qərargah rəisi general-leytenant Məhəmməd Hüseyn Baqiri, ali dini rəhbərin müşaviri Əli Şamxani, “Hatəm-əl-Ənbiya” Qərargahının rəisi Qulam Əli Rəşid və digər yüksək rütbəli şəxslər, o cümlədən üç nüvə alimi həlak olub.
İran isə bir neçə saat sonra cavab zərbələrinə başlayıb. Tehran İsrail istiqamətində 100-dən çox pilotsuz təyyarə göndərib.
