BAKI, 9 aprel. TELEQRAF

“JPMorgan Chase & Co.” maliyyə xidmətləri şirkəti ABŞ iqtisadiyyatı ilə yaxından əlaqəli olan səhmlərdə tənəzzül təhlükəsinin 80%-ə yaxınlaşdığını, şirkət istiqrazlarına sərmayə qoyanların isə maliyyələşmə ilə bağlı artan gərginlik riskinə baxmayaraq nikbinliyini qoruduğunu açıqlayıb.

Teleqraf xəbər verir ki, “Russell 2000” indeksi hazırda iqtisadi tənəzzül ehtimalını 79% səviyyəsində qiymətləndirir.

Eyni zamanda, digər aktiv kateqoriyaları da xəbərdarlıq edib.

“S&P 500” indeksi iqtisadi geriləmə ehtimalını 62% göstərir. Bununla belə, investisiya dərəcəli şirkət istiqrazları bazarında tənəzzül ehtimalı cəmi 25% səviyyəsindədir. Lakin bu göstərici noyabrda qeydə alınan sıfır səviyyəsindən xeyli yüksəkdir.

“Bloomberg”in 2–3 aprel tarixlərində keçirdiyi sorğuda iştirak edənlərin 92%-i geniş miqyaslı gömrük rüsumlarının tətbiqinin qarşıdakı 12 ay ərzində ABŞ iqtisadiyyatında durğunluq riskini artırdığını bildirib.

ABŞ-nin keçmiş maliyyə naziri Lourens Sammers də Birləşmiş Ştatların hazırda tənəzzülə doğru irəlilədiyini və gömrük rüsumlarının artırılması səbəbilə potensial olaraq 2 milyon amerikalının işsiz qala biləcəyini açıqlayıb.