
BAKI, 27 mart. TELEQRAF
Rumıniyanın Eforie Nord şəhərində kişilər arasında şahmat üzrə Avropa çempionatı başa çatıb.
Teleqraf xəbər verir ki, Azərbaycan şahmatçılarından ən yaxşı nəticəni Nicat Abasov əldə edib.
Son turda heç-heçə oynayan Abasov 8 xalla 8-ci yeri tutub.
11-ci turu qələbə ilə başa vuran Read Səmədov ilk "20-liy"ə daxil olub.
Reqlamentə əsasən, Avropa çempionatında turnir cədvəlinin ilk 20 pilləsində yer alan şahmatçılar Dünya Kubokunda iştirak imkanı qazanıb.
Yekun sıralamada 12-ci yeri tutan Səmədov bu il baş tutacaq Dünya Kubokunda iştirakını təsdiqləyib.
Eyni zamanda ilk 20-likdə olan şahmatçılardan bəziləri əvvəlki yarışlarda Dünya Kubokuna vəsiqə əldə etdiyinə görə 23-cü yerdə qərarlaşan Əhməd Əhmədzadə də mötəbər yarışda iştirakını rəsmiləşdirib.
Qitə çempionatında Read Səmədov ikinci qrossmeyster (GM), Şahin Vəliyev isə ilk beynəlxalq usta (IM) balını toplayıb. Ümid Aslanov 2300 reytinqi keçərək FIDE ustası (FM) titulunu əldə edib.
Qeyd edək ki, Rauf Məmmədov və çempionatı 8-ci yerdə başa vuran Nicat Abasov Dünya Kubokuna vəsiqəni əvvəlki yarışlarda qazanıb.