BAKI, 11 avqust. TELEQRAF
“Meta” korporasiyasının həmtəsisçisi Mark Zukerberq süni intellektin (Sİ) müəyyən şəxslərin və ya kiçik qrupların nəzarətində mərkəzləşdirilməsi ideyasını tənqid edib.
Teleqraf xəbər verir ki, Zukerberq şirkətin saytında dərc olunan məqaləsində superintellektin geniş şəkildə əlçatan olmasının və insanların ondan fərdi şəkildə istifadə edə bilməsinin vacibliyini vurğulayıb.
“Bəziləri hesab edir ki, superintellekt özü və ya ona nəzarət edən kiçik ekspert qrupu bəşəriyyət üçün nəyin daha yaxşı olduğuna qərar verməlidir. Biz bununla razı deyilik. Superintellekti mərkəzləşdirmək əvəzinə, onu geniş şəkildə yaymalı və hər bir insana onu idarə etmək imkanı verməliyik”, - Zukerberq bildirib.
Onun sözlərinə görə, bu yanaşma insanların potensialını daha dolğun reallaşdırmasına, maraqlarını inkişaf etdirməsinə və həyat keyfiyyətini yaxşılaşdırmasına imkan verə bilər.
Zukerberq bildirib ki, “Meta” fərdi “superintellekt” texnologiyalarının inkişafı üzərində işləyir. Məqsəd hər bir insanın şəxsi Sİ agentinə, müxtəlif sahələr üzrə yüksək səviyyəli virtual müəllimlərə və yaradıcılıq alətlərinə çıxışını təmin etməkdir.
“Superintellektin yaradılması həyatımız boyu şahidi olacağımız ən əhəmiyyətli texnoloji sıçrayış ola bilər”, – “Meta”nın həmtəsisçisi vurğulayıb.
