BAKI, 5 avqust. TELEQRAF

ABŞ-nin "SpaceX" şirkəti gələcəkdə "Starship" kosmik sistemi vasitəsilə ildə 10 milyon tona qədər yükü orbitə çatdırmağı hədəfləyir.

Teleqraf xəbər verir ki, bunu şirkətin rəhbəri İlon Mask rüblük maliyyə hesabatının təqdimatından sonra keçirilən audiokonfransda deyib.

Onun sözlərinə görə, hazırda "SpaceX"in "Falcon" daşıyıcı raketləri vasitəsilə ildə təxminən 2,5 min ton yük orbitə çıxarılır.

"Qalan bütün şirkətlər birlikdə təxminən 300 ton yük daşıyır. Beləliklə, Yer orbitinə göndərilən bütün yüklərin 80-90 faizi bizim payımıza düşür. Starship vasitəsilə əvvəlcə ildə 1 milyon tondan çox, son mərhələdə isə 10 milyon ton yükü orbitə çatdırmağı planlaşdırırıq", - Mask bildirib.

Qeyd edək ki, "SpaceX" iyul ayında "Starship" kosmik gəmisinin prototipi ilə 13-cü sınaq uçuşunu həyata keçirib. Şirkət ilk dəfə olaraq gəminin yük bölməsindən 20 ədəd "Starlink V3" peykini uğurla orbitə buraxıb. Missiya "Starship"in Hind okeanına uğurlu enişi ilə başa çatıb.

"SpaceX"in planına əsasən, "Starship" sistemi insanlı uçuşlar, peyklərin orbitə çıxarılması, Ay və Mars missiyaları, həmçinin daha uzaq kosmik obyektlərə ekspedisiyalar üçün istifadə olunacaq. Layihəyə görə, "Super Heavy" sürətləndiricisi və "Starship" tam təkrar istifadə oluna bilən sistem kimi şaquli eniş həyata keçirəcək.