BAKI, 28 iyul. TELEQRAF
ABŞ Prezidenti Donald Tramp Vaşinqtonla Tehran arasında aparılan danışıqların hazırda dostluq şəraitində keçdiyini bildirib.
Teleqraf xəbər verir ki, Tramp bu barədə Miçiqan ştatının Detroyt şəhəri yaxınlığında Konqresə noyabrda keçiriləcək aralıq seçkiləri öncəsi təşkil olunan təşviqat tədbirində çıxışı zamanı danışıb.
ABŞ liderinin sözlərinə görə, Vaşinqtonun İrana qarşı hərbi zərbələri bərpa etməsi olmasaydı, tərəflər arasında danışıqlar baş tutmazdı.
"Əgər sərt davranmasaydıq, bu danışıqlar olmazdı. Hazırda onlar çox dostluq şəraitində danışıqlar aparırlar", - deyə Tramp bildirib.
O əlavə edib ki, İranı güzəştlərlə razı salmaq mümkün deyil və ABŞ Tehranın nüvə silahı əldə etməsinə heç vaxt imkan verməyəcək. Tramp, həmçinin iddia edib ki, Tehran Vaşinqtondan İranın dəniz limanlarına tətbiq olunan blokadanın mümkün qədər tez aradan qaldırılmasını xahiş edir.
Bununla yanaşı, İran tərəfi dəfələrlə bəyan edib ki, nüvə silahı hazırlamaq niyyətində deyil. Qərb kəşfiyyat orqanlarının da Tehranın nüvə silahı proqramı həyata keçirdiyini təsdiqləyən sübut aşkar etmədiyi bildirilir. Bundan əlavə, 2003-cü ildə İranın ali dini rəhbəri ayətullah Əli Xameneinin fətvası ilə nüvə silahının istehsalı qadağan edilib.
Xatırladaq ki, ABŞ və İsrail arasında İranla bağlı hərbi qarşıdurma 28 fevralda başlayıb. İyun ayında Vaşinqton və Tehran hərbi əməliyyatların dayandırılmasını nəzərdə tutan memorandum imzalasalar da, ABŞ 8 iyulda Hörmüz boğazı ilə bağlı razılaşmaların pozulduğunu əsas gətirərək İrana qarşı genişmiqyaslı zərbələri yenidən bərpa edib.
