BAKI, 15 iyul. TELEQRAF
ABŞ Senatının üzvü Riçard Blumental Rusiyaya qarşı yeni sanksiyalar nəzərdə tutan qanun layihəsinin avqust ayına qədər qəbul edilə biləcəyini bildirib.
Teleqraf xəbər verir ki, bu barədə TASS məlumat yayıb.
Konnektikut ştatını təmsil edən demokrat senatorun sözlərinə görə, Ağ Ev qanun layihəsini dəstəkləyir.
“Ağ Ev bu qanun layihəsini dəstəkləyir. Hesab edirəm ki, sənəd avqust ayına qədər qəbul oluna bilər”, - deyə Blumental mətbuat konfransında bildirib.
Qeyd edək ki, sözügedən qanun layihəsi 2025-ci ilin aprelində ABŞ Senatında respublikaçı və demokrat senatorlardan ibarət ikipartiyalı qrup tərəfindən təqdim olunub. Sənədin əsas müəllifləri Riçard Blumental və iyulun 11-də vəfat edən senator Lindsi Qrem olub.
Layihədə Rusiyanın ticarət tərəfdaşlarına qarşı ikinci dərəcəli sanksiyaların tətbiqi də nəzərdə tutulur. İyulun 14-də təqdim edilən yenilənmiş variantda isə Rusiya nefti və qazını alan üçüncü ölkələrə tətbiq oluna biləcək rüsumların həcmi əvvəlki 500 faizdən 100 faizə endirilib.
Bundan başqa, Rusiyadan idxal edilən enerji resurslarının payı ümumi neft və qaz idxalının 15 faizindən az olan, eyni zamanda bu asılılığı azaltmaq üçün ciddi addımlar atan ölkələr üçün istisnalar nəzərdə tutulub.
ABŞ Prezidenti Donald Tramp da iyulun 14-də qanun layihəsinin qəbul olunma ehtimalının yüksək olduğunu desə də, sənədin bəzi əsas müddəalarını hələ nəzərdən keçirməli olduğunu bildirib.
