BAKI, 5 aprel. TELEQRAF

İsrail Müdafiə Qüvvələri Qəzza zolağının şimal və cənub hissələrində quru əməliyyatlarını genişləndirib.

Teleqraf xəbər verir ki, bu barədə "Walla" xəbər portalı məlumat yayıb.

Xəbərə görə, aprelin 6-na keçən gecə ərzində İsrail ordusu Beyt Hanun, Beyt Lahiya, Rəfah və Moraq oxu boyunca əlavə ərazilərə nəzarəti ələ keçirib.

İsrail Hərbi Hava Qüvvələri və artilleriya bölmələri isə HƏMAS-a məxsus obyektləri vurmaq və quru qüvvələrini dəstəkləmək üçün fəal şəkildə hərəkət edib.

Qeyd olunur ki, Moraq oxu Rəfah və Xan-Yunis şəhərləri arasında uzanır və 2005-ci ildə İsrailin birtərəfli ayrılma planı çərçivəsində sökülən “Moraq” yəhudi məskəninin adını daşıyır. Bu xətt təxminən 15 kilometr uzunluğunda olan və Misirlə Qəzza arasındakı “Filadelfiya dəhlizi”nə paralel yerləşir.

İsrailin baş naziri Benyamin Netanyahunun aprelin 2-də verdiyi bəyanatda bildirilib ki, İsrail Moraq oxunu nəzarətə götürür və bu ərazi ikinci Filadelfiya dəhlizinə çevriləcək.

Fələstin hökuməti isə İsrailin bu hərəkətlərini qəti şəkildə pisləyib.