BAKI. 29 iyul. TELEQRAF

Azərbaycan atıcısı Xanna Əliyeva Fransanın Şatoru şəhərində keçirilən Avropa çempionatında bürünc medal qazanıb.

Federasiyanın mətbuat xidmətindən Teleqraf-a verilən məlumata görə, Əliyeva standart tapança ilə 25 metr məsafəyə atəş açma yarışında 560 xal və 12 daxili onluq (x) nəticə göstərib.

Yarışın ilk iki pilləsində Macarıstan təmsilçiləri qərarlaşıblar.

Qeyd edək ki, daha əvvəl dairəvi stend (skeet) üzrə qarışıq duet komandası kateqoriyasında mübarizə aparan Niyaz Ağazadə və Rigina Meftaxetdinova cütlüyü bürünc medal qazanıb.