BAKI, 20 fevral. TELEQRAF
Ötən illər ərzində yeni konstitusiya layihəsi ilə bağlı konsepsiyaların hazırlanması səyləri olub və bu konsepsiyaların mahiyyətcə bu gün işlənib hazırlandığını söyləmək olar.
Teleqraf xəbər verir ki, bu barədə Ermənistanın ədliyyə naziri Srbuhi Qalyan bildirib.
“İndi bizim vəzifəmiz yeni konsepsiya hazırlamaq deyil, konstitusiyanın yeni mətnini hazırlamaqdır. Əlimizdən gələni etməliyik ki, yeni seçkilərə qədər (2026-cı ilədək) konstitusiya layihəsinin mətni hazır olsun”, - nazir deyib.
Qalyan seçkilərdən sonra konstitusiya referendumunun keçirilə biləcəyini istisna etməyib: “Çox güman ki, belə olacaq”.
Qarabağa "istinad"ın yeni konstitusiyadan çıxarılmasının mümkün olub-olmadığı soruşulduqda Ermənistanın ədliyyə naziri belə cavab verib:
“Heç nəyi istisna etmirəm, hələ o məsələ ilə bağlı yekun qərarımız yoxdur, amma bu gün mətndə olan ifadənin real həyatımızda heç nəyi dəyişdirmədiyi ehtimalı da var. Lütfən, mətnə münasibət bildirməməyə icazə verin, müvafiq komitəyə (Konstitusiya İslahatları Şurasına) şərh vermək hüququmuzu özümüzdə saxlayacağıq.
Bundan əlavə, prosesin inklüzivliyini təmin etmək üçün vətəndaş cəmiyyəti ilə çoxsaylı müzakirələr aparmağı planlaşdırırıq və bu dəyişikliklər prosesdə aydınlaşacaq”.
Xatırladaq ki, Baş nazir Nikol Paşinyan bundan əvvəl Ermənistanın yeni konstitusiyaya ehtiyacı olduğunu açıqlayıb.
Erməni mənbələrinə görə, baş nazirin bu planı Azərbaycanın müvafiq tələbi ilə bağlıdır. Söhbət Azərbaycan və Türkiyəyə qarşı ərazi iddialarının yer aldığı qeydlərin Ermənistan konstitusiyasından çıxarılmasından gedir.
