BAKI, 12 dekabr. TELEQRAF

Rusiya xarici işlər naziri Sergey Lavrov faktiki olaraq ABŞ Prezidenti Donald Tramp tərəfindən təklif olunan 28 maddəlik sülh planının 7 əsas bəndini rədd edib.

Teleqraf xəbər verir ki, bu barədə ABŞ-nin Müharibə Araşdırmaları İnstitutu (ISW) məlumat yayıb.

ISW-yə görə, həmin bəndlər aşağıdakılardır:

Zaparojye və Xerson vilayətlərində cəbhə xəttinin dondurulması;

Zaparojye AES-in fəaliyyətinin Rusiya yox, Atom Enerjisi üzrə Beynəlxalq Agentliyin (AEBA) nəzarətində bərpa olunması;

1997-ci il sərhədlərinə geri dönülməsini tələb etmədən NATO-nun gələcək genişlənməsinin dayandırılması;

Avropa ölkələrinin qırıcı təyyarələrinin Polşada yerləşdirilməsinə icazə verilməsi;

Ukraynaya etibarlı təhlükəsizlik zəmanətlərinin verilməsi;

Ukraynanın suverenliyinin təsdiqlənməsi;

Dini azlıqların qorunmasına dair Avropa İttifaqı normalarının tətbiqi.

ABŞ institutu həmçinin vurğulayıblar ki, Kremlin sülh danışıqlarına münasibəti 2025-ci ildə də dəyişməyib. Rusiya Prezidenti Vladimir Putin bundan əvvəl bəyan edib ki, Moskva heç kimə güzəştə getmək və ya ilhaq edilmiş əraziləri təhvil vermək niyyətində deyil.