BAKI, 3 aprel. TELEQRAF
Türkiyəli jurnalist Fatih Portakal müxalif Cümhuriyyət Xalq Partiyasının (CHP) aprelin 6-da keçiriləcək qurultayına namizəd kimi qatılacağı iddia edilən bu partiyanın sabiq sədri Kamal Kılıçdaroğluna sərt təpki verib.
Teleqraf xəbər verir ki, o, CHP-nin keçmiş liderini son prezident seçkilərində insanları aldatmaqda ittiham edib.
“Kamal Kılıçdaroğlu bazar günü qurultayda namizəd ola bilərmi? Heç nə demir. Amma səs çoxluğu əldə edilsə və təklif edilsə, bunu nəzərdən keçirə biləcəyi ilə bağlı təəssürat yaradıb. Mən də soruşuram, Kamal bəy, sizi namizəd göstərsələr, hansı üzlə namizəd olacaqsınız? Deyir, özüm namizəd olmayacam, amma namizədliyimi irəli sürsələr, düşünərəm. Düşünməyin, Kamal bəy, düşünməyin. O kresloda hansı üzlə oturacaqsınız?
Tutaq ki, namizəd oldunuz, hansı üzlə olacaqsınız? Tutaq ki, qalib gəldiniz, hansı üzlə orada oturacaqsınız?
Ümidimi məhv etdiniz, siz məni aldatdınız. Məni və mənim kimi 2023-cü ildə dəyişiklik istəyənləri aldatdınız”, - Portakal qeyd edib.
Jurnalist Kılıçdaroğlunun bütün bunlardan sonra yenə də öz siyasi iddiaları uğrunda mübarizə apardığını bildirib:
“Artıq bu barədə düşünməyin, namizəd olmayın. Kifayətdir.
80 yaşdan sonra millətə nə verəcəksiniz? CHP-ni ayağa qaldırmağı düşünürsünüz? Ən çox lazım olan məqamda bunu edə bilməmişdiniz. İnsanların ümidlərindən sui-istifadə etmisiniz. “Beşlik” – “Altılıq Masa” deyə-deyə, insanları aldatdınız, bir-birinizi kürəyinizdən bıçaqladınız.
İndi utanmadan çıxıb deyəcəksiniz ki, mən namizədəm. Bunu etməyin. Çünki sizin adınız var və bu ada ləkə gətirməyin. Sizdən xahiş edirəm. Çünki bizə ümid lazımdır, o ümid bitdi, o siz deyilsiniz. Səhifəniz bağlandı, müddətiniz bitdi. Ümid edirəm ki, bunu başa düşəcəksiniz”.
