BAKI, 12 mart. TELEQRAF

Ukraynanın dünən Səudiyyə Ərəbistanında (Ciddə) ABŞ ilə danışıqlarda cəbhədə atəşkəsə razılıq verməsi Rusiya Prezidenti Vladimir Putini çətin duruma salıb.

Teleqraf xəbər verir ki, bu barədə “Atlantic Council” yazır.

ABŞ nəşri bildirir ki, Kiyevin Vaşinqtonun təşəbbüsünü açıq şəkildə dəstəkləməsindən sonra dünya ictimaiyyətinin diqqəti Rusiyanın reaksiyasına yönəlib. ABŞ Prezidenti Donald Tramp bu həftə Putinlə məsələni şəxsən müzakirə etməyi planlaşdırdığını açıqlayıb. Kreml təklif olunan atəşkəsi dəstəkləməkdən imtina edərsə, bu, Trampın müharibə haqqında təsəvvürünü əsaslı şəkildə dəyişdirə və Rusiyanı sülhə əsas maneə kimi göstərə bilər.

Nəşr qeyd edir ki, bundan sonrakı hadisələr Trampın Putinlə şəxsi münasibətlərinin dinamikasını daha yaxşı anlamağa imkan verəcək:

“Əgər səyləri uğursuz olarsa, Tramp Moskvaya qarşı daha sərt mövqe tutmaq üçün artan təzyiqlərlə üzləşəcək”.

ABŞ Ukrayna və Rusiya arasında danışıqlar prosesinin ilk mərhələsi kimi atəşkəsdə israr edir. Real sülh sazişi hələ çox uzaqda olsa da, bu ilkin addım mühüm təkan ola bilər. Moskva atəşkəsi dəstəkləməsə, Ukraynaya hərbi yardımı artırmaq və Rusiyaya qarşı əlavə sanksiyalar tətbiq etmək üçün ABŞ və Avropaya təzyiqlər güclənəcək.