BAKI, 24 sentyabr. TELEQRAF

“Çinin J-10CE çoxməqsədli qırıcılarının Özbəkistana satışı üçüncü ölkələrə qarşı yönəlməyib”.

Teleqraf xəbər verir ki, bunu Çin Müdafiə Nazirliyinin sözçüsü Çjan Bin təyyarələrin Özbəkistan Hərbi Hava Qüvvələrinə təhvil verilməsinin başa çatması ilə bağlı danışarkən deyib.

O qeyd edib ki, Çin və Özbəkistan arasında münasibətlər dostluq xarakteri daşıyır: “Tərəflərin hərbi-ticari əməkdaşlığı beynəlxalq hüquq və təcrübəyə uyğundur və heç bir üçüncü tərəfə qarşı yönəlməyib”.

Avqust ayında Özbəkistan Müdafiə Nazirliyi ilk dəfə Çin istehsalı J-10CE qırıcı təyyarələrinin xidmətə qəbul edildiyini göstərən video yayımlamışdı. Özbəkistan Pakistandan sonra bu qırıcı təyyarələrin ikinci xarici müştərisi olub. Əlcəzair, Banqladeş, Misir, İndoneziya və Sudan müxtəlif vaxtlarda onlara maraq göstərib.