BAKI, 8 oktyabr. TELEQRAF

Türkmənistan və Xorvatiya Aşqabadda əməkdaşlıq prioritetlərini müəyyən edib

Türkmənistan Prezidenti Sərdar Berdiməhəmmədov Xorvatiyanın xarici və Avropa işləri naziri Qordan Qrliç-Radman ilə görüşüb.

Teleqraf xəbər verir ki, görüşdə Türkmənistanın daimi bitərəflik statusuna arxalanaraq bütün dövlətlərlə dinc münasibətlər qurduğu və BMT ilə fəal əməkdaşlıq etdiyi vurğulanıb.

Sərdar Berdiməhəmmədov Türkmənistan ilə Xorvatiya arasında əlaqələrin dostluq və qarşılıqlı fayda prinsipləri əsasında inkişaf etdiyini bildirib. O, iki ölkənin BMT-nin təşəbbüslərinə birgə töhfələrini və beynəlxalq təşkilatlara seçkilər zamanı bir-birini dəstəkləməsini nümunə kimi göstərib.

Dövlət başçısı Türkmənistanın siyasi, iqtisadi və humanitar sahələrdə əlaqələri gücləndirmək üçün Xorvatiya tərəfinin təkliflərinə baxmağa hazır olduğunu qeyd edib.

Görüşün sonunda tərəflər konstruktiv dialoqun inkişaf etdirilməsi istəklərini təsdiqləyiblər.