BAKI, 1 aprel. TELEQRAF
Pakistanın keçmiş baş naziri və ölkənin ən böyük müxalifət partiyası “Ədalət Uğrunda Hərəkat”ın lideri İmran Xan Pakistan Dünya Alyansı (PWA) hüquq müdafiə təşkilatı tərəfindən Nobel sülh mükafatına namizəd göstərilib.
Teleqraf xəbər verir ki, bu barədə “The Times of India” məlumat yayıb.
“Biz İmran Xanın Pakistanda insan haqları və demokratik dəyərlərə verdiyi töhfəyə görə Nobel sülh mükafatına namizəd göstərmişik”, - qurumun bəyanatında deyilir.
İmran Xan ikinci dəfədir nüfuzlu mükafata namizəd göstərilir. 2019-cu ildə Hindistanla hərbi gərginliyi azaltmaq səylərinə görə Pakistanda bu mükafata namizədliyi irəli sürülmüş və parlamentdə onun namizədliyini dəstəkləmək üçün qətnamə təqdim edilmişdi. Bununla belə, Xan mükafatın Kəşmirlə bağlı Pakistan-Hindistan mübahisəsinə yekun həlli gətirən və bölgədə sülhə yol açan siyasətçiyə verilməli olduğunu deyərək, Nobelə layiq olmadığını demişdi.
İmran Xan 2018-2022-ci illərdə Pakistan baş naziri olub. 2022-ci il aprelin 10-da parlamentdə etimadsızlıq səsverməsindən sonra vəzifəsindən kənarlaşdırılıb. 2023-cü ildə vəzifə səlahiyyətlərindən sui-istifadə və korrupsiya ittihamları ilə 14 il həbs cəzası alıb.
