BAKI, 9 oktyabr. TELEQRAF

Bəyan edilmiş məqsədlərimiz gənc vəkillərin maraqlarını, təhsilini və rifahını təşviq etmək və gənc vəkillər arasında peşəkar və sosial əlaqələr qurmaqdır.

Teleqraf xəbər verir ki, bunu EYBA-nın vitse-prezidenti Federiko Kamurati Bakıda keçirilən Avropa Gənc Vəkillər Assosiasiyasının (EYBA) payız konfransı "EYBA Autumn Conference 2026" tədbirində çıxışı zamanı deyib.

O bildirib ki, gənc vəkillər assosiasiyalarının inkişafını həvəsləndirmək və hamıya təsir edən siyasətlərə təsir göstərmək də əsas məqsədlərdəndir.

"Mən adətən süni intellektlə bağlı olan qorxulardan danışmaq istəmirəm. Biz onları eşitmişik və gələcəkdə də eşidəcəyik. Hətta süni intellekt sistemlərini yaradan və icad edən insanların bəzilərinin də bizi bu cür sistemlərin inkişafını ləngitmək zərurəti barədə xəbərdar etdiyini görürük. Lakin mən süni intellekt haqqında düşünəndə, artıq hamımız üçün reallıq olan fövqəladə inkişaf və innovasiyalar haqqında düşünməyə üstünlük verirəm", - o vurğulayıb.

O qeyd edib ki, vəkillik sahəsində süni intellekt işi daha səmərəli, daha sürətli və daha dəqiq edib:

"Xüsusən də təfərrüatlı şəkildə nəzərdən keçirməli olduğumuz sənədlərin və məlumatların həcmi çox böyük olduqda xəta marjası əhəmiyyətli dərəcədə artır. Beləliklə, süni intellekt artıq bir reallıqdır. O bizim bu günümüzdür, imtina etməyi seçə biləcəyimiz fərziyyəvi bir gələcək deyil. Ona görə də biz bununla barışmalıyıq".