BAKI, 3 aprel. TELEQRAF

ABŞ Prezidenti Donald Tramp Azərbaycan məhsullarına tarif tətbiq edib.

Teleqraf xəbər verir ki, bununla bağlı Birləşmiş Ştatlar lideri sərəncam imzalayıb.

Sərəncama əsasən, ABŞ-a idxal olunan məhsullara 10% tarif tətbiq olunacaq. Qeyd edək ki, D.Tramp 100-dən çox ölkəyə qarşılıqlı tariflər tətbiq edib.

Tariflər 3 aprel 2025-ci il tarixindən qüvvəyə minir.

ABŞ Azərbaycanın qeyri-neft məhsullarını ixrac etdiyi əsas ölkələr siyahısındadır. Bu ilin yanvar-fevral aylarında Azərbaycan bu ölkəyə 10 milyon 263.40 min dollar dəyərində qeyri-neft məhsulları ixrac edib. Azərbaycanın bu ölkəyə ümumi ixracı da təxminən bu qədər olub - 10 milyon 263.52 min dollar.

Bəs, Tampın tətbiq etdiyi tariflər Azərbaycanın bu ölkəyə ixracına necə təsir göstərəcək?

Milli Məclisin İqtisadi siyasət, sənaye və sahibkarlıq komitəsinin üzvü, deputat Vüqar Bayramov bildirib ki, yeni tariflər daha çox qeyri neft-qaz ixrac məhsullarına təsir göstərir: “2024-cü ildə qeyri neft-qaz məhsulları üzrə ABŞ-a ixracatımız 134 milyon 663 min dollar olub. Azərbaycan mənşəli qeyri neft-qaz məhsulları üzrə isə 55 milyon 949 min dollarlıq ixrac qeydə alınıb. 2024-cü ildə qeyri neft-qaz məhsulları üzrə ümumi ixracatımızın 3 milyard 356 milyon dollar, Azərbaycan mənşəli qeyri neft-qaz məhsulları üzrə ümumi ixracatın isə 2 milyard 883 milyon dollar olduğunu nəzərə alsaq Birləşmiş Ştatlar ilə bu sahədə əməkdaşlığımız heç də yüksək paya malik deyil.

Birləşmiş Ştatlara qeyri neft-qaz məhsulları ixracatımıza gəldikdə isə, 2024-cü ildə dünyanın ən güclü iqtisadiyyatına malik ölkəsinə 6 milyon 508 min dollarlıq polimerləşmə nəticəsində əmələ gələn ilkin formalı digər maddələr, 593 min dollarlıq heyvanların bağırsaqları, kisəcikləri və mədələri, təzə, soyudulmuş, dondurulmuş məhsullar, 410 min dollarlıq tropik və digər meyvələrin şirələri, 279 min dollarlıq nərə balıqlarının kürüsü, 242 min dollarlıq saflaşdırılmamış, əla növ birinci sıxma zeytun yağı, 177 min dollarlıq meyvələrdən cemlər, meyvə jelesi və mürəbbələr, meyvə püreləri və pastaları və digər məhsulları ixrac etmişik.

Göründüyü kimi, Azərbaycanın Birləşmiş Ştatlara qeyri neft-qaz ixracatı böyük məbləğdə olmasa da belə, mal qrupları üzrə şaxələnib. Deməli, Vaşinqtonun tarifləri Azərbaycanın ABŞ-a ixracata ciddi təsir göstərməsə də ümumi artım dinamikasına təsir edə bilər. Sözsüz, bütün hallarda yeni tarif yeni xərc deməkdir. Yəni, Birləşmiş Ştatlara ümumi ixracatımızdakı artım faizinin azalacağı istisna deyil. Eyni zamanda, Birləşmiş Ştatlara göndərdiyimiz məhsullar daha çox spesifik olduğu üçün 10 faizlik tarif həmin məhsulların bazardakı mövqeyinə təsir göstərməyə bilər. Amma bütün hallarda, yeni tariflər dünya iqtisadiyyatında yeni mərhələnin başlanması demək olacaq”.