BAKI, 3 aprel. TELEQRAF

Suraxanı Rayon Sukanal İdarəsi rayon ərazisində içməli su təchizatı və kanalizasiya şəbəkəsinin istismarını həyata keçirir.

İri Şəhərlərin Birləşmiş Su Təchizatı Xidmətindən Teleqraf-a verilən məlumata görə, müntəzəm fəaliyyət nəticəsində rayon əhalisi dayanıqlı və keyfiyyətli su ilə təmin edilir.

İdarənin xidməti ərazisinə su beş mənbədən – 41 Şərq su anbarı, 82 Şərq su anbarı, Qaraçuxur su anbarı, Ceyranbatan-Qala-Pirallahı su kəməri və Maştağa su xətti vasitəsilə daxil olur. Rayon ərazisində müxtəlif diametrli 15 giriş və çıxış su xətləri mövcuddur. Ümumilikdə, Suraxanı rayonu üzrə əhalinin su təchizatı 98 faiz təşkil edir. Abonentlərin 48 faizi (təxminən 145 min nəfər) fasiləsiz su ilə təmin olunur, 58 faiz əhali isə gündəlik qrafik üzrə ən azı 6 saat su alır.

Suraxanı Rayon Sukanal İdarəsinin baş mühəndisi Nəriman İsmayılovun sözlərinə görə, rayon ərazisində 496 kilometr məhəllədaxili içməli su xətləri və 116 kilometr magistral su kəmərləri fəaliyyət göstərir. Bundan əlavə, idarənin balansında 22 nasos stansiyası və 23 su anbarı mövcuddur. Yeni Günəşli qəsəbəsi V massivində yerləşən nasos stansiyası 5500 abonenti 24 saat fasiləsiz su ilə təmin edir.

Sukanal İdarəsi şəhərin müxtəlif ərazilərində baş verən su və kanalizasiya qəzalarını operativ şəkildə aradan qaldırır. Görülən işlər çərçivəsində məhəllədaxili və küçələrdə köhnəlmiş kanalizasiya boruları yeniləri ilə əvəz olunur. Ötən il ərzində su şəbəkəsində 3103, kanalizasiya şəbəkəsində isə 6428 qəza aradan qaldırılıb. Bundan əlavə, 3.7 kilometr yeni su xətti və 1.2 kilometr yeni kanalizasiya xətti çəkilib. Kanalizasiya şəbəkəsi üzrə 17 kilometrdən artıq xətt xüsusi təyinatlı maşınlarla yuyularaq təmizlənib, 1458 abonent sayğacla təmin edilib. Beləliklə, sayğaclı abonentlərin sayı 84.214-ə çatıb.

Bundan başqa, ötən il 45 çoxmərtəbəli yaşayış binasının zirzəmisində 800 metrə yaxın kanalizasiya xətləri dəyişdirilərək əsaslı təmir olunub.

Qeyd edək ki, Suraxanı Rayon Sukanal İdarəsi rayon üzrə 300 min nəfərdən artıq əhalinin su təchizatına cavabdehdir və 662 kilometr su, 276 kilometr kanalizasiya şəbəkəsinə xidmət göstərir.