BAKI, 5 oktyabr. TELEQRAF

Portuqaliya millisinin baş məşqçisi Jorje Jezuş beşqat “Qızıl top” sahibi Kriştianu Ronaldunun yığmaya qayıtmasına hazır olduğunu bildirib.

Teleqraf xəbər verir ki, Jezuş bu barədə Millətlər Liqasında Norveçlə oyundan sonra açıqlama verib. Portuqaliyalı mütəxəssis Ronaldo ilə aralarında baş verənləri anlaşılmazlıq adlandırıb və problemin asanlıqla həll edilə biləcəyini söyləyib.

“Bilmirəm, nə baş verəcək. Mənim üçün bütün variantlar açıqdır. O, növbəti çağırışadək gələcəyi ilə bağlı qərar verməlidir. Əgər oynayırsa və milli komandada olmaq istəyirsə, istədiyi vaxt qayıda bilər. Niyə də yox? Bu, anlaşılmazlıq idi və məncə, asanlıqla həll edilə bilər. Mənim tərəfimdən hər şey qaydasındadır”, – Jezuş bildirib.

Bundan əvvəl Ronaldo Millətlər Liqasının qrup mərhələsinin Danimarka ilə üçüncü tur oyunundan əvvəl Portuqaliya millisinin düşərgəsini tərk edib. Hücumçu daha sonra bu qərarının səbəblərini açıqlayacağını bildirmişdi.

“A Bola”nın məlumatına görə, Jezuş yaranmış gərginliyin davam etməsini istəmir və Ronaldunu noyabrda Millətlər Liqasının son iki qrup oyununa çağırmağa hazırdır. 41 yaşlı futbolçunun da baş məşqçinin bu mövqeyindən xəbərdar olduğu bildirilir.

Ronaldo beş dəfə Çempionlar Liqasının qalibi olub, Portuqaliya millisi ilə Avropa çempionluğunu və iki dəfə Millətlər Liqasını qazanıb. O, 2022-ci ilin dekabrından Səudiyyə Ərəbistanının “Əl-Nəsr” klubunda çıxış edir.