BAKI, 6 aprel. TELEQRAF

“Turan Tovuz”un oyunçusu Orxan Əliyev Teleqraf-a müsahibə verib.

30 yaşlı hücumçu komandasının nəticələri və öz çıxışı barədə sualları cavablandırıb.

- ⁠Avrokuboklara namizəd komandanın sonuncu yerdə olan “Səbail”i məğlub edə bilməməsinin səbəbi nədir?

- ⁠Matç barədə çox fikir bildirmək istəmirəm. Bakıya 3 xal dalınca gəlmişdik, amma alınmadı.

- ⁠“Turan Tovuz”un qələbəsiz oyunlar seriyası 5-ə çatdı…

- ⁠Növbəti oyunlarda uğursuz seriyanı qırmağa çalışacağıq. Yenə xal itirmək şansımız yoxdur.

- ⁠5 oyuna 2 xal necə nəticədir?

- ⁠Təbii ki, pis nəticədir. Komanda şəklində toparlansaq, hər şey başqa cür ola bilər.

- ⁠Bu oyunda harada səhv etdiniz?

- ⁠Səhvimiz olsaydı qol buraxardıq. Təhlükəli epizod yarada bilmirdik. Cəmi bir epizodda qola yaxın olduq. “Səbail” də pis oynamırdı. Amma qol vursaydıq, hər şey başqa cür ola bilərdi.

- ⁠Sonda azarkeşlərlə aranızda nə baş verdi? Veysəl Rzayevi niyə özündən çıxartdılar?

- ⁠Düzü, həmin məqamı görmədim. Bir az baxdım, sonra geyinib-soyunma otağına qayıtdığım üçün nə baş verdiyini tam görmədim. Mənə heç nə demədilər. Gördüm vəziyyət gərgindir, oradan uzaqlaşdım.

- ⁠Az oyun şansı qazanmağın psixoloji olaraq pis təsir göstərirmi?

- ⁠Çalışacağam daha çox şans qazanıb, özümü yaxşı tərəfdən göstərim. Bir müddət zədədən əziyyət çəkdim. Bərpa prosesi də bir az vaxt aldı.

- Ötən yay xaricə getmək planın vardı, amma alınmadı. Yenə fikrində bu variant var yoxsa “Turan Tovuz”da qalmağı düşünürsən?

- ⁠Bunu zaman göstərəcək. Hələ ki, “Turan Tovuz”la müqaviləm var. Gələcəkdə hər şey ola bilər.

- ⁠Avrokuboklar üçün mübarizə aparan “Turan Tovuz” hazırda 4-cü pillədə yer alır. Düşünürsünüzmü, kuboku “Sabah” və ya “Neftçi” qazansa buna nail ola bilməyəcəksiniz?

- ⁠Bəli, hər şeyin fərqindəyik. Növbəti turlarda qələbə qazanmalıyıq. Daha çox xal qazanmalıyıq ki, 4 yox 3-cü yer uğrunda mübarizə aparaq.

- ⁠Növbəti turda “Sabah”la qarşılaşacaqsız ki, xal fərqiniz azdır. Bu oyun sizin üçün nə qədər prinsipallıq daşıyır?

- ⁠Ancaq qələbə qazanmalıyıq. Başqa variant yoxdur. Əgər xal itirsək, bizə yaxınlaşacaqlar. Onda işimiz daha çətin olacaq.