BAKI, 4 aprel. TELEQRAF

Aprelin 4-də Bakıda keçirilən Cənub Qaz Dəhlizi Məşvərət Şurası nazirlərin 11-ci iclası və Yaşıl Enerji Məşvərət Şurası nazirlərin 3-cü iclası “Nazirlər sessiyası”, “Cənub Qaz Dəhlizi sessiyası: Cənub Qaz Dəhlizinin uğurlu istismarı və inkişafında tərəqqi və növbəti addımlar” və “Yaşıl enerji layihələri və yaşıl enerji dəhlizləri” üzrə 3 plenar sessiya ilə davam edib.

Teleqraf xəbər verir ki, Azərbaycanın energetika naziri Pərviz Şahbazov bildirib ki, təbii qaz uzun müddət enerji balansının mərkəzi komponenti olaraq dayanıqlı enerji təhlükəsizliyi üçün davamlı investisiyaları zəruri edəcək.

Nazir deyib ki, Azərbaycan, Avropa İttifaqı (Aİ), enerji şirkətləri, regional maraqlı tərəflər və maliyyə institutları arasında koordinasiyalı və güclü əməkdaşlıqla Cənubi Qaz Dəhlizinin uğurunu yeni bir mərhələyə yüksəltmək mümkündür.

"Enerji təhükəsizliyi üçün diversifikasiyanın alternativi yoxdur və bu gün 12 ölkəni təchiz edən Azərbaycan qazı və Cənub Qaz Dəhlizinin strateji əhəmiyyəti məhz belə bir siyasətə əsaslanır. Təbii qazla bağlı mövcud məhdudiyyətlərə baxmayaraq, Azərbaycan bu illər ərzində etibarlı enerji təchizatçısı roluna müvafiq tədarük həcmlərinin artırılması və təchizat coğrafiyasının genişləndirilməsi sahəsində mühüm irəliləyişlər əldə etdi. 2021-ci ildə Avropaya 8,2 milyard kubmetr qaz tədarük olunarkən, ötən il bu göstərici 12,9 milyard kubmetrə çatdı ki, bu da 57%-dən çox artım deməkdir. Ötən il Azərbaycandan qaz axınının təxminən 10%-i Gürcüstana, 39%-i Türkiyəyə yönəldiyi halda 51%-i Avropanın payına düşüb. Hazırda CQD üzvü olmayan Avropa ölkələri tərəfindən Azərbaycandan tələb olunan qaz həcmi 14 milyard kubmetrdir. Azərbaycan və Avropa alıcıları arasında uzunmüddətli qaz müqavilələri, Aİ-nin təminatları və maliyyə dəstəyi, Cənubi Qaz Dəhlizinin uğurla genişləndirilməsinin əsas amilləridir və bu, nəticə etibarilə Avropanın daha dayanıqlı enerji təhlükəsizliyini təmin edəcək. Nəql imkanlarının genişləndirilməsi 2030-cu ilin sonuna qədər 2700 MVt gücündə yaşıl enerji stansiyalarının şəbəkəyə qoşulması nəticəsində qənaət olunacaq 1,5 milyard kubmetr təbii qazın ixracı üçün də mühüm əhəmiyyət kəsb edir”.

Nazir Azərbaycanın Xəzər dənizindəki külək elektrik stansiyalarından və Mərkəzi Asiyadan Avropaya böyük həcmdə “yaşıl enerji” tədarükünə yönəlmiş meqa təşəbbüslərin icrasından da bəhs edib. “Bildirilib ki, “Xəzər-Qara dəniz-Avropa” dəhlizinin texniki-iqtisadi əsaslandırması 2025-ci ilin ortalarına qədər tamamlanacaq və birinci mərhələdə 4 QVt gücündə elektrik enerjisi ixrac ediləcək:

“Mərkəzi Asiya-Azərbaycan” dəhlizinin texniki-iqtisadi əsaslandırmasını Asiya İnkişaf Bankı və Asiya İnfrastruktur İnvestisiya Bankı maliyyəşdirəcək və tədqiqat işləri bu ilin ikinci rübündə başlayacaq: “Azərbaycan-Türkiyə Yaşıl Enerji Dəhlizi”nin texniki-iqtisadi əsaslandırması iki potensial ixrac marşrutunu araşdırıb və bu gün Azərbaycan, Gürcüstan, Türkiyə və Bolqarıstan arasında yaşıl elektrik enerjisi sahəsində əməkdaşlıq haqqında Anlaşma Memorandumunun imzalanması ilə daha bir dəhliz üzrə işə başlanacaq".