BAKI, 3 aprel. TELEQRAF

“Qazprom” Avropada etibarlı təbii qaz təchizatçılarının azaldığını və gələn yay yeraltı anbarları doldurmaqda çətinliklərlə üzləşəcəyini açıqlayıb.

Teleqraf xəbər verir ki, bu barədə şirkətdən məlumat verilib.

Qeyd edilib ki, Avropa ölkələrinin yeraltı qaz anbarlarındakı ehtiyatlar sürətlə tükənir. 31 mart tarixinə həmin anbarlarda 34,3 milyard kubmetr qaz qalıb.

“Qazprom” Avropanın mövsümə boş anbarları doldurmaqla başlayacağı qeyd edilib:

“Etibarlı qaz mənbələrinin azalması nəzərə alındıqda, Avropa bu yay yeraltı anbarlarını doldurmaqda və qarşıdakı qışa hazırlaşmaqda çətinlik çəkəcək”, - deyə şirkətdən əlavə edilib.

Qeyd edək ki, Ukrayna müharibəsindən əvvəl Avropanın ən böyük təbii qaz təchizatçısı olan “Qazprom” təxminən 50 il davam edən boru kəməri investisiyaları sayəsində bazar payını 40 faizə qədər artırmışdı.

Sanksiyalar səbəbindən müştərilərini ABŞ, Qətər və Norveç kimi mayeləşdirilmiş təbii qaz (LNG) tədarükçülərinə itirən “Qazprom” ötən il Avropaya təxminən 15 milyard kubmetr təbii qaz nəql edib, halbuki bu həcm 2021-ci ildə 201,7 milyard kubmetr səviyyəsində olub.