BAKI, 4 aprel. TELEQRAF

"Cənub Qaz Dəhlizi Avropa üçün strateji zənginlikdir və bu bizim planlarımızın ayrılmaz hissəsidir. Son illərdə Azərbaycan nəinki, etibarlı tərəfdaş kimi öz mövqeyini qoruyub, o cümlədən öz coğrafiyasını xeyli genişləndirib”.

Teleqraf xəbər verir ki, bu barədə energetika naziri Pərviz Şahbazov Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.

Nazirin sözlərinə görə, geosiyasi gərginliyə və bazarlardakı volatilliyə baxmayaraq təbii qaz enerji təhlükəsizliyinin ən təməl daşı, strateji zənginlik olaraq qalır və uzun müddət energetikanın mərkəzi komponenti olacaq:

"Bu öz növbəsində, qaz yataqlarına və infrastruktura investisiyaların yatırılmasını tələb edir. Biz vacib reallığı nəzərə alaraq sürətli qərarlar qəbul etməliyik. Belə olmasa lazımi təchizat həcmlərinin təmin edilməsi ümumiyyətlə uğursuzluğa düçar olacaq".