BAKI, 3 aprel. TELEQRAF

TAP qaza olan tələbatın İtaliyada 15%-ni, Yunanıstanda isə 18%-ni təmin edir.

Energetika Nazirliyindən Teleqraf-a verilən məlumata görə, bu barədə Cənub Qaz Dəhlizi Məşvərət Şurası nazirlərin 11-ci iclası və Yaşıl Enerji Məşvərət Şurası nazirlərin 3-cü iclası çərçivəsində energetika naziri Pərviz Şahbazovla TAP-ın icraçı direktoru Luka Skyepatti arasından keçirilən görüş zamanı qeyd edilib.

Məlumata görə, görüşdə etibarlı enerji təchizatında təbii qazın və infrastrukturların inkişafının əhəmiyyəti, Trans-Adriatik Boru Kəməri (TAP) layihəsinin genişləndirilməsi prosesinin cari vəziyyəti nəzərdən keçirilib. Cənub Qaz Dəhlizinin, o cümlədən TAP-ın enerji təhlükəsizliyinin təminatında strateji rolu yüksək qiymətləndirilib. Bildirilib ki, indiyə qədər Avropaya ümumilikdə 45 milyard kubmetrdən çox qaz təchiz edilib.

Söhbət zamanı 2026-cı ildən etibarən kəmərin 1,2 milyard kubmetr genişləndirilməsindən sonra növbəti nəzərdə tutulan addımlar, həmçinin metan emissiyalarının azaldılması ilə bağlı da müzakirələr aparılıb.