BAKI, 4 aprel. TELEQRAF

Təchizat mənbələrinin davamlı şəkildə şaxələndirilməsi, o cümlədən Azərbaycandan olan idxal bizim enerji tələbatlarımızın təmin edilməsinə imkan verəcək.

Teleqraf xəbər verir ki, bunu Moldovanın energetika naziri Dorin Junqetu Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.

Onun sözlərinə görə, təbii qaz Moldovanın enerji strukturunda mühüm rol oynamaqda davam edəcək.

“Bu, bizim bərpaolunan enerji imkanlarımızı genişləndirəcək. Buna görə də biz istərdik ki, şaquli dəhliz inkişaf etsin. Bu da Moldova energetikasının gələcəyi üçün əsas layihədir. Ümumiyyətlə, Moldova Cənub Qaz Dəhlizinə tam sadiqdir. Enerji təhlükəsizliyi, dayanıqlıq və bazarın inteqrasiyası kimi ümumi maraqlara da sadiqik. Biz birlikdə çətinlikləri aradan qaldıra, yeni imkanlar yarada bilərik və daha təhlükəsiz, daha da çiçəklənən enerji gələcəyimizi hamımız üçün təmin edə bilərik”, - deyə moldovalı nazir əlavə edib.

Nazir Moldovanın Cənub Qaz Dəhlizi təşəbbüsündə mühüm rol oynadığını bildirib:

"Biz Yunanıstan-Bolqarıstan Qaz İnterkonnektorundan kommersiya baxımından istifadə edən ilk ölkəyik".